Gvardiola: Manchester Siti yangi mavsumga tayyor turibdi

“Manchester Siti” bosh murabbiyi Xosep Gvardiola jamoa yangi mavsum boshlanishiga qanday holatda kirib kelayotgani haqida o‘z fikrlarini bildirdi. Bu haqida Euro-football.ru xabar berdi.

Joriy haftada “shaharliklar” mavsumoldi yagona o‘rtoqlik uchrashuvida “Palermo” jamoasini 3:0 hisobida mag‘lub etdi. Gvardiolaning aytishicha, Klublar o‘rtasidagi jahon chempionati boshlanganidan buyon jamoada yaxshi muhit shakllangan.

Uning so‘zlariga ko‘ra, “Al-Xilol”ga qarshi o‘yinda jamoa o‘tish bosqichlarini to‘liq nazorat qila olmagan bo‘lsa-da, futbolchilar o‘z ustida ishlashda davom etmoqda. Murabbiy shuningdek, jamoaning ta’tili bir hafta uzoq bo‘lganini, bu esa ko‘proq mashg‘ulotlarga e’tibor qaratish imkonini berganini ta’kidladi.

U o‘rtoqlik o‘yinlari sonini ko‘paytirishni istamaganini, asosiy e’tibor mashg‘ulotlarga qaratilganini qayd etdi. “Palermo” bilan o‘yin bosim ostida o‘tmagan, natija uchun emas, jamoaning tayyorgarligini baholash uchun tashkil etilgan.

Gvardiola yangi mavsumda, ayniqsa Angliya chempionatida, jamoa o‘tgan yilgidan ko‘ra barqarorroq o‘ynashiga umid bildirdi. Klub matbuot xizmati xabariga ko‘ra, 16 avgust kuni “Manchester Siti” Angliya chempionatining birinchi turida “Vulverxempton”ga qarshi maydonga tushadi.