Markaziy himoyachi Inyigo Martines “Barselona” klubini tark etib, Saudiya Arabistonining “Al-Nasr” jamoasiga o‘tdi. Bu haqida Euro-football.ru xabar berdi.
Ispaniyalik futbolchi yangi jamoasiga erkin agent sifatida qo‘shildi, ya’ni transfer uchun to‘lov amalga oshirilmadi. 34 yoshli Martines “Barselona” bilan shartnomasini o‘zaro kelishuv asosida bekor qilgan.
Mahalliy matbuot xabariga ko‘ra, Martines dastlab Kataloniya klubini tark etishni rejalashtirmagan, biroq “Al-Nasr”ning taklifi uning uchun juda jozibador bo‘lgan. U yangi klubida avvalgidan deyarli ikki barobar ko‘proq maosh oladi.
Inyigo Martines 2023 yil yozidan beri “Barselona” sharafini himoya qilib kelgan. Ushbu davr mobaynida u klub safida 71 ta uchrashuvda maydonga tushdi.
O‘tgan mavsumda markaziy himoyachi jamoasiga ichki musobaqalarda barcha sovrinlarni qo‘lga kiritishda yordam berdi. Martinesning tajribasi va barqaror o‘yini yangi jamoasiga ham foyda keltirishi kutilmoqda.
