Rossiya oliy ligasida futbolchilar ish haqi chegaralanadi
Rossiya futbolida amalga oshiriladigan islohotlar haqida yangi ma’lumotlar paydo bo‘ldi. Bu haqida Euro-football.ru xabar berdi.
Ichki manbalarga ko‘ra, kelasi mavsumdan boshlab mamlakat futbolida moliyaviy tartibga solish bo‘yicha yangi qoidalar joriy etilishi rejalashtirilgan. Hozircha barcha tafsilotlar ochiqlanmagan, biroq asosiy o‘zgarishlardan biri sifatida futbolchilar uchun ish haqi bo‘yicha yuqori chegarani belgilash ko‘zda tutilgan.
Mazkur loyiha ustida ish olib borilayotgani va tegishli qaror loyihasi muhokama qilinayotgani ma’lum qilindi. Shuningdek, avvalroq Rossiya sport vaziri futbol bo‘yicha chet ellik futbolchilar soniga oid yangi cheklovlar kiritilishini bildirgan edi.
Yangi tartibga ko‘ra, Rossiya oliy ligasi klublari bir vaqtning o‘zida maydonga besh nafar chet ellik futbolchidan ortiq chiqarolmaydi. Shu bilan birga, har bir klub mavsum uchun eng ko‘pi bilan o‘n nafar xorijiy futbolchini ro‘yxatdan o‘tkazishi mumkin bo‘ladi.
Ushbu o‘zgarishlar Rossiya futbolida tartib va moliyaviy barqarorlikni ta’minlash, shuningdek, mahalliy futbolchilar rivojini qo‘llab-quvvatlash maqsadida amalga oshirilmoqda. Mutasaddilar bu islohotlar orqali futbol sohasida raqobatni oshirish va yosh futbolchilarga imkoniyat yaratishni ko‘zlamoqda.
Islohotlarning aniq talablari va qoidalari yaqin kunlarda e’lon qilinishi kutilmoqda.
