Manchester Yunayted hujumchisi Rasmus Xoylun Italiya A Seriyasi klublari orasida katta qiziqish uyg‘otmoqda. Bu haqida Euro-football.ru xabar berdi.
Manchester Yunayted yaqinda hujumchi Benyamin Sheshkoni o‘z safiga qo‘shdi. Shu sababli, klub Rasmus Xoylun uchun maqbul taklif tushsa, uni boshqa jamoaga o‘tkazishga tayyor ekani kutilmoqda.
Ma’lumotlarga ko‘ra, Xoylun xizmatlariga nafaqat Milan, balki Inter, Yuventus, Napoli va Roma klublari ham qiziqish bildirmoqda. Bu jamoalar vakillari futbolchi va uning agenti bilan bog‘langan.
Italiya klublarining Xoylun o‘yiniga bo‘lgan qiziqishi, uning Angliyaga yo‘l olguniga qadar Atalanta safida ko‘rsatgan o‘yinlari bilan bog‘liq. Hozirda Transfermarkt portali ma’lumotiga ko‘ra, Rasmus Xoylunning transfer narxi 35 million yevroga baholanmoqda.
Ehtimol, 22 yoshli futbolchi yangi mavsumda ijaraga berilib, keyinchalik uning to‘liq transferi yuzasidan kelishuvga erishilishi mumkin. Shu tariqa, Xoylun faoliyatini yana Italiya chempionatida davom ettirishi ehtimoli yuqori.
