“Manchester Siti” Donnarummani darvozabon sifatida olib kelishi mumkin
“Manchester Siti” jamoasi yozgi transfer oynasi yopilishidan oldin asosiy darvozaboni Edersondan ayrilishi mumkin. Bu haqida Euro-football.ru xabar berdi.
Ma’lum bo‘lishicha, “Galatasaray” klubi 31 yoshli braziliyalik futbolchini transfer qilish bo‘yicha “Manchester Siti” bilan to‘g‘ridan-to‘g‘ri muzokaralar olib bormoqda. Agar Ederson klubni tark etsa, “Manchester Siti” uning o‘rniga “PSJ” darvozaboni Janluiji Donnarummani olib kelishni ko‘zlamoqda.
Bu haqda jurnalist Fabrisa Xokins ijtimoiy tarmoqlarda xabar berdi. Ma’lumotlarga ko‘ra, 26 yoshli italiyalik darvozabon bilan shaxsiy shartnoma borasida kelishuvga erishish muammo bo‘lmaydi.
Eslatib o‘tamiz, Donnarumma “PSJ”ning UEFA Superkubogi uchun tarkibiga kiritilmadi. Bu holat, ehtimol, klub futbolchini sotishga qaror qilganidan dalolat beradi.
Sababi, “PSJ” Donnarumma bilan amaldagi shartnomani uzaytirish borasida kelishuvga erisha olmadi. Hozirgi shartnoma muddati 2026 yilning o‘rtalarigacha amal qiladi.
Shu sabab, kelgusi transfer oynasida Donnarummaning boshqa klubga o‘tishi ehtimoli yuqori.
