Jeykob Remzi Nyukaslga 46 million yevroga o‘tmoqda
Aston Villa futbolchisi Jeykob Remzi yaqinda Nyukasl jamoasiga o‘tishi kutilmoqda. Bu haqida Euro-football.ru xabar berdi.
Tomonlar transfer bo‘yicha muzokaralarni deyarli yakunlashgan. Ma’lumotlarga ko‘ra, Nyukasl ushbu futbolchini o‘z safiga qo‘shib olish uchun qariyb 40 million funt sterling (taxminan 46 million yevro) to‘laydi.
Jeykob Remzini o‘z jamoasiga taklif qilish uchun Vest Hem ham harakat qilgan, biroq futbolchining o‘zi Nyukasl variantini afzal ko‘rgan. Remzi Aston Villa safida 167 ta uchrashuvda maydonga tushgan.
U yarim himoya va hujum chizig‘ida turli pozitsiyalarda o‘ynab, 17 ta gol va 19 ta samarali uzatmaga mualliflik qilgan. Jumladan, 2024/25 yilgi mavsumda 45 ta o‘yinda to‘rt marta raqib darvozasini ishg‘ol qilgan va yetti bor golli pas bergan.
Shu hafta oxirida, aniqrog‘i shanba kuni, Aston Villa hamda Nyukasl jamoalari Angliya Premer-ligasining yangi mavsumidagi ilk turda o‘zaro bahs olib borishadi. Ushbu uchrashuvda Remzining kelajagi ham ko‘pchilik e’tiborida bo‘ladi.
