Vilyarreal futbol klubi yaqinda yarim himoyachi Tomas Parti bilan shartnoma imzoladi. Bu haqida Euro-football.ru xabar berdi.
Ayni paytda ushbu futbolchi Angliyada besh marotaba zo‘rlash va bir marotaba jinsiy zo‘ravonlikda ayblanmoqda. Klub prezidenti Fernando Royg ushbu vaziyat yuzasidan o‘z fikrini bildirdi.
Roygning so‘zlariga ko‘ra, hozirda sud jarayoni davom etmoqda va futbolchi o‘zini aybsiz deb biladi hamda qo‘yilgan ayblovlarni rad etmoqda. Klub esa aybsizlik prezumpsiyasiga amal qiladi.
Ya’ni, barcha dalillar va holatlar sud tomonidan to‘liq o‘rganilishi kerak. Klub rahbari zo‘ravonlik har qanday shaklini qoralashini ta’kidladi, biroq aybsizlik prezumpsiyasiga hurmat bilan yondashishini ham bildirgan.
Hozirgi vaqtda Parti aybdor deb topilmagan va u sud hukmi chiqqunga qadar o‘z faoliyatini davom ettirish huquqiga ega. Ma’lumot uchun, La Liga birinchi turida Vilyarreal jamoasi Real Oviedo klubiga qarshi maydonga tushadi.
Klub rahbari barcha jarayonlar qonun doirasida va adolatli tarzda olib borilishiga ishonch bildirdi.
