Tottenxem futbol jamoasida yangi sardor tanlandi. Bu haqida Euro-football.ru xabar berdi.
Jamoaning oldingi sardori Xon Min Son tarkibdan ketganidan so‘ng, bosh murabbiy Tomas Frank himoyachi Kristian Romeroni sardor etib tayinlashga qaror qildi. Bu haqda Frank jurnalistlarga bergan intervyusida ma’lum qildi.
Murabbiy Romero bilan ochiq va samimiy suhbat o‘tkazganini, u bu lavozimga tayinlanganidan juda mamnun bo‘lganini aytdi. Shuningdek, Frankning ta’kidlashicha, Romero nafaqat UEFA Superkubogi uchrashuvida, balki butun mavsum davomida jamoani maydonga boshlab chiqadi.
Murabbiy Romeroning sardorlik uchun barcha zarur fazilatlarga ega ekanini qayd etdi. Kristian Romero 2022 yil avgust oyining oxiridan buyon Tottenxem safida to‘p suradi.
Argentinalik himoyachi shu vaqtgacha jamoa tarkibida 124 ta o‘yinda ishtirok etgan. U bu uchrashuvlarda yettita gol urishga va uchta golli uzatma berishga muvaffaq bo‘lgan.
Tottenxem rahbariyati va murabbiylar shtabi Romeroning tajribasi va yetakchilik qobiliyatiga katta ishonch bildirgan. Endilikda u yangi mavsumda jamoa sardori sifatida maydonga tushadi.
