Rasmus Xoylun Milan bilan transfer muzokaralarini davom ettirmoqda
Manchester Yunayted hujumchisi Rasmus Xoylun Milan klubi bilan muzokaralarni davom ettirmoqda. Bu haqida Euro-football.ru xabar berdi.
Dastlab daniyalik futbolchi “qizil iblislar” safidan ketishni istamagan edi, biroq hozirda u transferga tobora ko‘proq rozilik bildirmoqda. Sababi, jamoa bosh murabbiyi Ruben Amorim unga asosiy tarkibda joy bermoqchi emas.
La Gazzetta dello Sport nashrining xabar berishicha, Xoylunning atrofdagilari, jumladan, uning otasi Milan rahbariyatiga taklif jiddiy ko‘rib chiqilayotganini ma’lum qilgan. 22 yoshli futbolchi va uning yaqinlari Milan klubini dunyoning eng muvaffaqiyatli jamoalaridan biri sifatida qadrlashadi.
Shuningdek, Xoylun bosh murabbiy Massimiliano Allegri bilan ishlash imkoniyatiga ham qiziqmoqda. Ma’lumotlarga ko‘ra, Milan klubi Rasmus Xoylun uchun dastlab 5 million yevro evaziga ijaraga olish, keyinchalik esa 40-45 million yevroga to‘liq sotib olish huquqi bilan shartnoma tuzishni rejalashtirmoqda.
Muzokaralar davom etmoqda va tomonlar kelishuvga erishish uchun harakat qilmoqda.
