Vitaliy Levchenko: "Nasaf" juda kuchli raqib, biz mezbonlar bilan tengma-teng o‘ynay oldik"

Superliganing 3-turidan o‘rin olgan "Nasaf" - "Neftchi" (0:0) uchrashuvidan so‘ng mehmonlar bosh murabbiyi Vitaliy Levchenko matbuot anjumanida ishtirok etdi.

- Avvalambor O‘zbekiston ahlini Ramazon hayit ayyomi bilan tabriklayman. Bugun faqat g‘alaba uchun maydonga chiqqandik. Qayerlardadir omad yetishmadi. Jamoani stabil o‘yin ko‘rsatishi uchun ishlayapmiz. Vaziyatlarni yakunlashda kamchiliklarimiz bor. Ehtimol bunday holatlar o‘yin tonusi bilan bog‘liqdir. Mashg‘ulotlarda jiddiy ishlaymiz, oldinda bizni oson o‘yinlar kutmayapti.

- "Neftchi"ning hozirgi tarkibida kuchli futbolchilar jam bo‘lgan. Ketma-ket 3 ta turdagi duranglar nima bilan bog‘liq?
- Aytib o‘tganimdek, bizga o‘yin tonusi yetishmayotgan bo‘lishi mumkin. O‘yindan-o‘yinga kamchiliklarni bartaraf etib boramiz. "Nasaf" juda kuchli raqib, biz mezbonlar bilan tengma-teng o‘ynay oldik. Vaziyatlardan foydalanganimizda ehtimol g‘alaba ham qozonishimiz mumkin edi.

- Ko‘pchilikda "Neftchi" o‘tgan mavsumdagi "Navbahor"ni takrorlayapti degan fikr paydo bo‘layapti...
- Jamoalar bir-biriga o‘xshashi mumkin. Bizning oldimizda aniq maqsad va vazifa bor. Biz bu borada jiddiy ishlayapmiz. Futbolchilar bir-birlarini tushunib borgani sayin o‘yinimiz kuchayib boraveradi.

- Vladimir Yovovich zaxirada qolganiga sabab nima?
- Futbolchidagi holatni murabbiylar shtabi yaxshiroq biladi. Biz unga bir oz dam berishga qaror qildik, biroq rejamizga ko‘ra u ikkinchi bo‘limda o‘yinga qo‘shilib, raqib uchun kutilmagan hujumlarni tashkil etishi lozim edi. Aytib o‘tganimdek, o‘yindan-o‘yinga kuchayib boramiz.