“SSKA” klubi va O‘zbekiston terma jamoasi futbolchisi Abbosbek Fayzullayevning Yevropaga yo‘l olishi mumkinligi haqida ko‘plab xabarlar tarqalgan edi. Ayniqsa, uning Portugaliyaning “Benfika” klubiga o‘tish ehtimoli yuqori baholangandi. Biroq oxir-oqibat ushbu transfer amalga oshmay qoldi.
Futbolchining agenti German Tkachenkoning ma’lum qilishicha, Fayzullayevning “Benfika”ga o‘tishi bo‘yicha dastlab muzokaralar olib borilgan. Ammo so‘nggi bosqichda Lissabon klubi rahbariyati siyosiy sabablarga ko‘ra bu kelishuvdan voz kechgan.
Tkachenko bu haqda shunday deydi:
"Biz Fayzullayevni 'Benfika'ga transfer qilishimiz mumkin edi. Dastlabki muzokaralar yaxshi ketayotgandi, ammo Portugaliya klubi rus futbolchilari yoki Rossiya klublarida to‘p surayotgan futbolchilar bilan aloqa o‘rnatishni istamadi. Ular 'Rossiya bilan hamkorlik qilmaymiz' degan pozitsiyani bildirdi."
Ma’lumot uchun, Fayzullayev 2023 yilda “Paxtakor” klubidan Moskva SSKAsiga o‘tgan va tezda jamoaning asosiy o‘yinchilari qatoriga qo‘shilgandi. Uning Yevropaga yo‘l olishi haqida turli taxminlar mavjud. Avvalroq 21 yoshli vingerga Germaniyaning “Bavariya” hamda Turkiyaning “Galatasaroy” klublaridan takliflar borligi haqida xabarlar tarqalgandi.
Hozircha futbolchining kelajagi haqida aniq qaror qabul qilinmagan. Biroq uning iste’dodi va o‘sish sur’ati hisobga olinsa, Yevropaning yirik klublari unga qiziqishda davom etadi.
