“Real” Ryudigerga ishonmoqda: Madrid grandi u bilan shartnomani uzaytirish niyatida
"Real Madrid" klubi tarixan 30 yoshdan oshgan futbolchilarga ehtiyotkorlik bilan yondoshadi. Ko‘p hollarda ularga faqat bir yillik shartnomalar taklif etiladi. Bu tamoyilni Luka Modrich misolida ham ko‘rish mumkin — u har yili shartnomasini yangilab kelmoqda.
Biroq madridliklar himoyadagi yetakchisi Antonio Ryudiger masalasida bundan istisno qilingan qaror qabul qilishmoqda.
Ryudigerning “Real”dagi faoliyati va muxim o‘rni
32 yoshli nemis himoyachisi Antonio Ryudiger “Real” safiga 2022 yil yozida qo‘shilgan edi. U shu vaqt ichida jamoaning asosiy tarkib o‘yinchisiga aylandi. Barcha turnirlarda u 145 ta o‘yinda ishtirok etib, nafaqat himoyada mustahkam o‘yin namoyish etdi, balki yettita gol va ikkita assist bilan ham jamoaga hissa qo‘shdi.
Ryudiger "Real" bilan Ispaniya La Ligasi va Yevropa Chempionlar Ligasida g‘alabalarga erishgan. Uning maydondagi qat’iyatli o‘yini va liderlik fazilatlari jamoa uchun juda muhim hisoblanadi.
Klubdan ishonch: Shartnoma uzaytirilishi kutilmoqda
Jurnalist Florian Plettenberg ma’lumotiga ko‘ra, “Real Madrid” Ryudigerning joriy shartnomasini (2026 yil yozigacha) yana ikki mavsumga uzaytirishni rejalashtirmoqda. Agar bu amalga oshsa, himoyachi 2028 yilning yarmigacha “qirollik klubi” safida qoladi.
Bu qaror Ryudigerning Saudiya Arabistoniga ketish haqidagi fikrlarini o‘zgartirishi mumkin. Ta’kidlash joizki, so‘nggi vaqtlarda unga arab klublaridan jiddiy qiziqishlar bildirilgandi.
"Real Madrid" klubi o‘z an’analaridan chekingan holda, Antonio Ryudigerga ishonch bildirishga tayyor. Bu klubning unafaqat yoshiga, balki professionalizm, barqarorlik va liderlik salohiyatiga ham ahamiyat qaratayotganini ko‘rsatadi.
Tajribali himoyachining Madridda qolishi jamoa himoyasi uchun muhim poydevor bo‘lib xizmat qilishda davom etadi.
