«Yuventus»ning iqtidorli himoyachisi «Manchester Siti»ga yo‘l olishi mumkin
Turinning «Yuventus» klubi tarkibida muvaffaqiyatli harakat qilayotgan qanot himoyachisi Andrea Kambyaso yaqin orada Angliya Premer-ligasida faoliyatini davom ettirishi mumkin. Bu haqda Britaniyaning mashhur «The Sun» nashri jurnalistlari ma’lum qilmoqda.
Ta’kidlanishicha, 24 yoshli himoyachiga ancha vaqtdan beri Pep Gvardiola boshchiligidagi «Manchester Siti» klubi jiddiy qiziqish bildirib kelmoqda. Angliyaliklar Kambyasoni qishdayoq o‘z safiga qo‘shib olmoqchi bo‘lgan, ammo yakuniy qaror futbolchini kelgusi yozgi transfer oynasida xarid qilishga qoldirilgan.
Manbaning ta’kidlashicha, Turin klubi italiyalik iqtidor egasini taxminan 40 million yevro evaziga sotishi mumkin.
Joriy mavsum davomida Andrea Kambyaso barcha musobaqalarda jami 39 ta o‘yinda maydonga tushib, o‘z hisobida 2 ta gol va 3 ta samarali uzatmani qayd etishga erishdi. Futbolchining «Yuventus» bilan amaldagi shartnomasi 2029 yilning iyun oyi oxirigacha tuzilgan.
Kambyasoning Angliyaga ehtimoliy ko‘chib o‘tishi borasidagi muzokaralar yaqin orada tezlashishi kutilmoqda. «Manchester Siti» esa himoya chizig‘ini kuchaytirish maqsadida uni o‘zining asosiy transfer maqsadlaridan biri sifatida belgilab qo‘ygan.
