«Real» tajribali futbolchilari Modrich va Vaskes bilan g‘alati shartnoma tuzdi
«Real Madrid» rahbariyati jamoaning ikki tajribali o‘yinchisi — xorvatiyalik yarim himoyachi Luka Modrich va ispaniyalik himoyachi Lukas Vaskesning kelajagi borasida g‘ayrioddiy qaror qabul qildi.
Ispan nashri AS tarqatgan xabarga ko‘ra, klub 30 iyun kuni shartnomasi yakunlanadigan ushbu ikki futbolchiga bor-yo‘g‘i ikki haftalik yangi bitim taklif qilgan.
Ma’lum bo‘lishicha, Madrid klubi ushbu tajribali futbolchilardan faqat klublar o‘rtasidagi jahon chempionati doirasidagina foydalanish niyatida. Eslatib o‘tamiz, FIFA tomonidan tashkil qilinayotgan ushbu yangi formatdagi musobaqa tashkilotchilarining o‘zi ham ishtirokchi klublarga muddati tugayotgan futbolchilar bilan qisqa muddatli shartnomalar tuzishni maslahat bergan edi.
«Qirollik klubi» rahbarlari, katta ehtimol bilan, mavsum tugagach Lukas Vaskes bilan xayrlashishga qaror qilib bo‘lishgan. Ammo «Oltin to‘p» sovrindori Luka Modrich yana bir mavsum davomida jamoada qoldirilishi mumkin. Bungacha esa 39 yoshli yulduz o‘z maoshining keskin pasaytirilishi va asosiy tarkibdagi rolidan voz kechib, zaxira variant sifatida faoliyat olib borishiga rozilik berishi kerak bo‘ladi.
Sizningcha, «Real» rahbariyatining ushbu qarori oqlanadimi yoki tajribali futbolchilarga nisbatan hurmatsizlikmi?
