Kamoliddin Tojiyev: "Moreyra shtabida ishlashim kerak bo‘lgandi"
Superliganing 9-turi doirasida "Buxoro" ustidan qozonilgan g‘alabadan keyin "Paxtakor" vaqtinchalik bosh murabbiyi Kamoliddin Tojiyev matbuot anjumanida qatnashdi.
O‘yin haqida
- Bugun o‘yin oldidan yigitlarga berilgan rejalarning barchasi ishladi. Hamma o‘z darajasida o‘ynadi. O‘yindan oldin futbolchilarga, barcha terma jamoa darajasidagi futbolchilar ekanligini aytdik. Ularni shu orqali ruhiyatini ko‘tarmasak, ruhiy tushkunlikdan olib chiqib bo‘lmaydi. Ruhiyatni ko‘tarib olsak, bu yigitlarning barchasi yuqori darajada o‘yin ko‘rsatadigan futbolchilar. Ular bugun o‘z saviyasini namoyish qilishdi.
- Bugun futbolchilar erkin o‘ynadi, xotirjamlikni namoyish qildi. Bu "Buxoro" kabi kuchsiz jamoaning fonida shunday ko‘rindimi yoki Sizning o‘tgan yilda jamoani qo‘lingizga olganingizdan keyingi kabi futbolchilar yana kuchli o‘yin ko‘rsatishni boshladimi?
- "Buxoro"ni kuchsiz raqib deb bo‘lmaydi. Superligada hozir kuchsiz jamoaning o‘zi yo‘q. Yigitlar men kelganimga zo‘r o‘ynadi emas, shunchaki ruhiy tomonlama ko‘tarilish qilishga harakat qildik. Menimcha bu yerda menmi yoki boshqa murabbiy bo‘lsa ham, ular o‘zlarini ko‘rsatishadi.
- Moreyra davrida "Paxtakor"ga nima yetishmadi?
- Ayrim o‘yinlardagi mag‘lubiyatlardan keyin futbolchilar bilan gaplashib ko‘rdim, ular o‘zlarini yeyishni boshlashdi. Shu orqali o‘yin ham chiqmadi. 2-3 kun ichida futbolchilar bilan gaplashib, ruhiy tomonlama ko‘tarishga intildim. Tarkibdagi barcha futbolchilar termaga nomzod. Ularga o‘zlaridagi ishonchni qaytarish kerak.
- Siz uzoq yildan beri "Paxtakor"dasiz. Sizga adolatsizlik qilishayotgandek tuyulmayaptimi? Ya’ni, o‘tgan yili Maksim Shatskix ijodiy ta’tilga chiqqanida Sizning qo‘l ostingizdagi jamoa yaxshi o‘yin ko‘rsatdi va keyinchalik Shatskix yana qaytdi. Bu yil ham shunday bo‘lib qolsa, adolatsizlik bo‘lmaydimi? Siz futbolchilar bilan ishlaysiz, natijalarga erishasiz. Keyin esa yana vaziyatni chigallashtirishadi. Yoki rahbariyat bilan barchasini gaplashib oldingizmi?
- Men "Paxtakor"dan ketmagandim, U19 jamoa bilan ishlayotgan edim. Moreyra boshchiligidagi murabbiylar shtabida bo‘lishim kerak edi, biroq ularning o‘zlari meni olmaslikka qaror qilishdi. Yoshlar jamoasida ishlab turib ham murabbiylar shtabi bilan gaplashib turardim. Endi buyog‘ini ko‘ramiz, barchasi rahbariyatga bog‘liq. Ular qayerda deyishsa, o‘sha yerda ishlaymiz.
- Klub xabarida Pedru Moreyra ta’tilga chiqdi deyildi. U iste’foga chiqarildimi yoki ta’tilga ketdimi?
- Bu savolga klubda ishlaydiganlar javob bera oladi.
