Ispaniyaning eng nomdor klublaridan biri hisoblangan "Barselona"da keyingi mavsumdan boshlab yangi yulduz porlashi kutilmoqda. Jamoaning yosh iqtidor egasi Lamin Yamal kelgusi mavsumdan boshlab afsonaviy 10-raqamda maydonga tushadi. Bu haqda Managing Barca nashri xabar tarqatdi, deb yozadi Championat.
Hozirda 17 yoshli futbolchi kataloniyaliklar safida 19-raqam ostida o‘ynab kelmoqda. Biroq futbolchi 13 iyul kuni o‘zining 18 yoshini nishonlaydi va aynan shu sanada klub bilan uzoq muddatli yangi shartnoma imzolaydi. Yangi shartnoma kuchga kirishi bilan Yamal "Barselona"ning afsonaviy 10-raqamini qabul qilib oladi.
Eslatib o‘tish joiz, bu raqam "Barselona"da o‘z vaqtida Lionel Messi, Ronaldino va Diego Maradona kabi jahon futboli yulduzlari tomonidan taqilgan edi. Hozirda ushbu raqam Ansu Fatiga tegishli, ammo mavsum yakunida uning jamoani tark etishi yoki boshqa raqamga o‘tishi ehtimoli yuqori hisoblanadi.
Ma’lum qilinishicha, Lamin Yamal klub bilan yangi shartnoma borasida allaqachon kelishuvga erishgan. Ushbu shartnomada futbolchining transfer tovoni sifatida rekord darajadagi mablag‘ — 1 milliard yevro belgilangan.
Yamalning joriy mavsumdagi ko‘rsatkichlari muxlislar va ekspertlarni hayratga solmoqda. U bu mavsum "Barselona" sharafini himoya qilib, barcha musobaqalarda 54 marta maydonga tushgan va bu o‘yinlarda 18 ta gol urib, 25 ta golli uzatma bergan. Bunday yuqori natijalar yosh iqtidor egasining klubdagi mavqeini yanada oshirdi.
Ko‘plab futbol mutaxassislari va jamoa muxlislari Lamin Yamalni Messi va Ronaldino kabi katta futbol yulduzlarining vorisi sifatida ko‘rishmoqda. Kelgusi mavsumda 10-raqam ostida uning qanday o‘yin namoyish etishi jamoa ishqibozlari tomonidan qiziqish bilan kutib qolinmoqda.
Zamin.uz tahririyati ushbu iqtidor egasi faoliyatini diqqat bilan kuzatib boradi. Sizcha, Yamal afsonaviy 10-raqamga munosib futbolchi bo‘la oladimi?
