Brunu Fernandesh “Al-Hilol”dan taklif oldi — javob kutilayapti!
Yevropa futbolida porlagan yulduzlar Saudiya Arabistoni chempionatiga yo‘l olayotgani yangilik emas. Endi esa navbat “Manchester Yunayted”ning o‘yinlarni boshqaruvchi yetakchisi Brunu Fernandeshga yetib kelgan ko‘rinadi. Taniqli jurnalist Ben Jeykobs tarqatgan ma’lumotlarga ko‘ra, portugaliyalik futbolchi Saudiyaning eng nufuzli klublaridan biri — “Al-Hilol”ning jiddiy e’tiborida.
Manbalarga ko‘ra, Fernandeshning agenti Migel Pinyu shu haftaning boshida Riyodga borib, “Al-Hilol” rahbarlari, jumladan klub prezidenti Fahad bin Nafal bilan muzokaralar o‘tkazgan. Uchrashuv davomida tomonlar futbolchining transferi bo‘yicha dastlabki kelishuvga erishishgan.
“Al-Hilol” Jahon klublar chempionati boshlanishidan avval yulduz futbolchilarni jamoasiga jalb qilishni maqsad qilgan. Shu sababli, ular Brunu Fernandeshdan javobni uzog‘i bilan payshanbagacha berishini so‘rashgan. So‘nggi 48 soat ichida klub vakillari transferni amalga oshirish bo‘yicha faol harakatlarni boshlagan.
Ayni paytda “Al-Hilol” manbalari Brunu Fernandesh bu taklifni rad etmaganini ma’lum qilgan. Bu esa futbolchi ushbu yangi chaqiriqni jiddiy qabul qilayotganini ko‘rsatadi. Ammo “Manchester Yunayted” rahbariyati ushbu vaziyatda o‘z sardorini qo‘ldan chiqarishni mutlaqo istamayapti va futbolchining ketishiga rozi emas.
Brunu Fernandesh joriy mavsum Angliya Premer-ligasida 36 ta uchrashuvda maydonga tushib, jamoasiga 6 ta gol va 10 ta aniq golli uzatma bilan yordam berdi. Uning faoliyati “Yunayted” uchun nafaqat statistika jihatidan, balki taktik va ruhiy jihatdan ham alohida ahamiyatga ega.
Fernandeshning “Yunayted” bilan amaldagi shartnomasi 2027 yilning yozigacha amal qiladi. Mutassaddilarning baholashicha, Transfermarkt portalida uning transfer qiymati 55 million yevro atrofida baholanmoqda. Bu summa “Al-Hilol” uchun to‘siq bo‘lmasligi mumkin — chunki klub transfer bozorida yirik sarmoyalar bilan faol harakat qilmoqda.
Endi esa barcha diqqat Brunu Fernandeshning shaxsiy qarorida. U kelgusi faoliyatini Yevropa futbolida davom ettiradimi yoki Saudiya ligasida yangi sahifa ochadimi — buni yaqin kunlar ko‘rsatadi.
Zamin.uz tahririyati Fernandeshning qarorini sabrsizlik bilan kutayotgan millionlab futbol ishqibozlari qatorida. Batafsil yangiliklar va rasmiy ma’lumotlar esa bizning saytimizda!
