Bugun, 31 may sanasida, butun futbol olamida diqqat markazida turgan o‘yin — UEFA Chempionlar ligasining 2024/25 mavsumi finali bo‘lib o‘tadi. Yevropa klub futbolining eng oliy sinovi sanalgan ushbu bellashuvda Fransiyaning “Pari Sen-Jermen” (PSJ) va Italiyaning “Inter” jamoalari chempionlik uchun maydonga tushishadi.
Finalga yo‘l: ikki qarama-qarshi manzil
PSJ o‘z tarixida ikkinchi bor YECHL finaliga yo‘l oldi. Ilk bor 2020 yilda “Bavariya”ga yutqazgan parijliklar bu safar taqdirni o‘z qo‘liga olib, ilk bor Yevropa toҷini qo‘lga kiritishni maqsad qilmoqda. Jamoa ushbu mavsumda pley-off bosqichida ajoyib o‘yinlar namoyish etib, “Liverpul”, “Aston Villa” va “Arsenal” kabi Angliyaning kuchli klublarini mag‘lub etgan holda finalga yo‘l oldi.
Boshqa tomonda esa — tarix va tajriba. “Inter” Chempionlar ligasida yettinchi finaliga chiqmoqda. Milanliklar oxirgi bor 2010 yilda Joze Mourino qo‘l ostida ushbu musobaqani yutgan edi. Bu mavsumda “Inter” o‘zining qadimiy kuchini tiklab, “Bavariya” va “Barselona”ni mag‘lub etdi. Ular to‘rtinchi bor YECHL tojini boshlariga kiyish niyatida.
Final tafsilotlari:
Stadion: “Allians Arena”, Myunxen (Germaniya)
Boshlanish vaqti: 23:00 (Toshkent vaqti)
Hakam: Ishtvan Kovach (Ruminiya)
Mazkur o‘yin PSJ va “Inter” o‘rtasida YECHL doirasidagi ilk to‘qnashuv hisoblanadi. Shu boisdan, ikki jamoa ham tarixga yangi sahifa yozish uchun maydonga chiqishadi.
Kimni tarix kutmoqda?
Bir tomonda o‘z mamlakatining moliyaviy va yulduzlar jihatidan eng baquvvat jamoasi — PSJ, boshqa tarafda esa muvozanat, intizom va an’analarga sodiq “Inter” jamoasi. Parijliklar uchun bu final o‘zini “Yevropa elitasi”dagi real grand sifatida namoyon etish imkoni. Milanliklar uchun esa bu – zabt etilgan tojni qayta egallash va o‘z nufuzini yanada mustahkamlash yo‘lidagi muhim sinov.
Futbol muxlislari bu kecha futbol tarixi yangilanishiga guvoh bo‘lishadi. Qaysi jamoa shon-shuhrat pog‘onasidan joy oladi — PSJning intiqlikda kutilgan g‘alabasimi yoki “Inter”ning qayta porlashimi? Javobini kechasi 23:00da olamiz.
