Angliya Premer-ligasining amaldagi chempioni «Liverpul» rahbariyati klub tarixidagi eng yorqin debyut mavsumlaridan birini o‘tkazgan bosh murabbiy Arne Slotga minnatdorchilik ifodasi sifatida yirik transferlarni amalga oshirishga kirishdi.
Hozirgi paytda «qizillar» transfer bozorida juda faol. Birinchi navbatda mersisaydliklar Germaniyaning «Bayer» klubidan iqtidorli himoyachi Jeremi Frimpongni sotib olganini rasman e’lon qildi. Juda tezkor va texnik jihatdan kuchli bo‘lgan bu himoyachi yangi mavsumdan Arne Slot qo‘l ostida maydonga tushadi.
Ammo bu hali hammasi emas. «Bayer»ning yana bir yulduzi, butun Yevropaning e’tiborida bo‘lgan 21 yoshli Florian Virs ham «Liverpul» safiga qo‘shilishga qiziqish bildirmoqda. Iste’dodli nemis futbolchisining Arne Slot bilan ishlash istagi katta ekanligi aytilmoqda. Agar bu transfer amalga oshsa, «qizillar»ning hujumkor o‘yin uslubi yanada kuchayishi kutilmoqda.
Bundan tashqari, «Liverpul» rahbariyati hujum chizig‘ini ham qaytadan kuchaytirish niyatida. Daily Mail nashri ma’lumotlariga ko‘ra, mersisaydliklar oldingi chiziq uchun Yevropaning uchta kuchli forvardi nomzodini aniqlab qo‘ygan. Ular orasida – «Ayntraxt» hujumchisi Ugo Ekitike, «RB Leypsig»ning yulduz futbolchisi Benyamin Sheshko va Ispaniyaning «Atletiko Madrid» klubida porlagan argentinalik Xulian Alvares bor.
Ugo Ekitike bu mavsumda Germaniya chempionatida o‘zining kuchli fizikasi va havodagi o‘yini bilan ajralib turdi. Uning tezligi va kuchli zarbalari «Liverpul» uchun ideal variant bo‘lishi mumkin.
Sloveniyalik Benyamin Sheshko esa «RB Leypsig» klubidagi ajoyib mavsumi bilan barcha top-klublarning diqqat markaziga tushgan. Uning golga bo‘lgan tinimsiz tashnaligi va yuqori golli potensiali Arne Slot uslubiga mos keladi.
Hulian Alvares esa Yevropa va Janubiy Amerika futbol muxlislariga yaxshi tanish bo‘lgan forvard. Uning yuqori texnikasi, maydondagi pozitsion aql-zakovati va kuchli zarbalari «Liverpul» uchun ajoyib tanlov bo‘lishi mumkin.
«Liverpul» rahbariyati bu uchala futbolchi uchun ham transfer muzokaralarini boshlab yuborgan va ulardan birini yozgi transfer oynasida jamoaga olib kelish niyatida.
Shunday qilib, Arne Slot rahbarligidagi «qizillar» kelasi mavsumda yana bir bor Premer-ligada chempionlik uchun jiddiy kurash olib boradi. Klubning ushbu yirik transferlari esa millionlab muxlislarning orzu-umidlarini yanada oshirmoqda.
