JCH-2026 saralash bosqichida BAAga qarshi o‘yinda muhim durang natijaga erishib, O‘zbekiston milliy terma jamoasi o‘z tarixida ilk bor jahon chempionatiga yo‘llanmani qo‘lga kiritdi. Ushbu uchrashuvdan keyin yosh va iqtidorli futbolchimiz Abbosbek Fayzullayev o‘zining hissiyotlari va taassurotlari bilan bo‘lishdi.
«Hozirgi hissiyotlarimni so‘zlar bilan ifodalash qiyin. Yoshligimdan bu kunni orzu qilib katta bo‘lganman. Bolalikda televizor orqali jahon chempionatlarini kuzatib, milliy jamoamiz maydonga tushishi uchun doim duo qilardim. Bu buyuk musobaqada qatnashish orzusi qalbimizni to‘ldirgan edi va bugun ana shu orzuga yetdik. Biz bu muvaffaqiyatga erishganimizdan cheksiz xursandmiz», — deya o‘z his-tuyg‘ularini yashirmadi futbolchi.
Abbosbek Fayzullayev shuningdek, O‘zbekiston Respublikasi Prezidenti Shavkat Mirziyoyevning o‘yindan so‘ng milliy jamoa bosh murabbiyi va futbolchilarga shaxsan qo‘ng‘iroq qilib tabriklagani haqida ham to‘lqinlanib gapirdi.
«Muhtaram Prezidentimiz bizga shaxsan qo‘ng‘iroq qilib, samimiy va iliq tabriklarini yo‘lladilar. Davlatimiz rahbarining bizga bo‘lgan alohida e’tibori va qo‘llab-quvvatlashi futbolchilarimiz uchun katta ruhiy dalda bo‘ldi. Ularga katta rahmat aytaman. Bu e’tibor va mehr o‘zining samarasini berdi», — deya ta’kidladi Fayzullayev.
Yosh futbolchi ushbu tarixiy muvaffaqiyatni kutib kelgan O‘zbekiston xalqini ham alohida tabrikladi.
«O‘zbekiston xalqini chin yurakdan tabriklayman. Bu muvaffaqiyatga xalqimiz haqli edi va ular buni uzoq kutdilar. Biz esa ana shu katta ishonch va orzularni amalga oshirishda ishtirok etganimizdan g‘ururlanamiz va bundan mamnunmiz», — dedi futbolchi.
Endi Abbosbek Fayzullayev va terma jamoamizning boshqa a’zolari 2026 yili AQSH, Kanada va Meksikada bo‘lib o‘tadigan Jahon chempionatida O‘zbekiston sharafini himoya qilishadi. Mazkur yo‘llanma mamlakatimiz futbolining yangi tarixiga tilla harflar bilan yoziladigan voqea bo‘ldi.
