Futbol ixlosmandlari uchun kutilgan pallalardan biri — Jahon chempionati-2026 saralash bosqichi qizg‘in pallaga kirdi. Turli mintaqalarda o‘tkazilayotgan o‘yinlardan so‘ng, katta musobaqaga yo‘l olgan ilk jamoalar soni 13 taga yetdi. Ulardan 10 nafari saralashda munosib ishtirok etib, tarixiy yo‘llanmani qo‘lga kiritgan bo‘lsa, yana 3 jamoa — Kanada, Meksika va AQSH mezbonlik huquqi asosida final bosqichiga to‘g‘ridan to‘g‘ri chiqdi.
Xalqaro futboldagi eng nufuzli musobaqa sanaladigan JCH-2026 uchun hozircha quyidagi terma jamoalar yo‘llanmani qo‘lga kiritdi:
?? Kanada
?? Meksika
?? AQSH
?? Yaponiya
?? Yangi Zelandiya
?? Eron
?? Argentina
?? O‘zbekiston
?? Janubiy Koreya
?? Iordaniya
?? Avstraliya
?? Braziliya
?? Ekvador
Aytish kerakki, O‘zbekiston terma jamoasining ushbu ro‘yxatda paydo bo‘lishi futbolimiz tarixida yangi sahifa ochdi. Bu — mamlakatning ilk marta Jahon chempionatida ishtirok etishi demakdir va muxlislar orasida orzu qilingan natijalardan biri bo‘ldi.
Jahon chempionati 2026-yilning yozida, ya’ni iyun–iyul oylarida Kanada, Meksika va AQSH maydonlarida bo‘lib o‘tadi. Bu galgi musobaqa tarixda ilk marta 48 ta jamoa ishtirok etadigan formatda tashkil etiladi. Har bir bosqichda kurash, dramatik ssenariylar va tarixiy natijalar bo‘lishi tabiiy.
Zamin.uz sayti esa JCH-2026 saralash va asosiy bosqichdagi barcha muhim yangiliklar, jamoalarning holati va terma jamoamizning chiqishlarini doimiy yoritib borishda davom etadi.
