Abbosbek Fayzullayev: Shubhalarni yo‘qqa chiqargan o‘zbek yulduzi
So‘nggi yillarda o‘zbek futbolining to‘lqinlantiruvchi va e’tibor markazidagi nomlaridan biri — Abbosbek Fayzullayev. Uning SSKA klubiga o‘tishi, Rossiyadagi porloq faoliyati va transfer bahosining keskin o‘sishi nafaqat mahalliy, balki xalqaro sport jamoatchiligida ham qizg‘in muhokamalarga sabab bo‘ldi.
Abbosbekning uslubi — maydondagi harakatchanlik, kuchli dribling, intellektual o‘yin va universallik bilan alohida ajralib turadi. Uning yoshi 21 bo‘lishiga qaramay, u katta yoshdagi tajribali futbolchilarga xos yetuklik bilan o‘yin namoyish qilmoqda.
Fayzullayevning SSKAga o‘tishidagi qiziq jihat shundaki, bosh murabbiy Fedotov boshchiligidagi murabbiylar shtabi avvalboshdan u haqida ishonch bilan fikr bildirmagan. Bu haqda ProSports Management rahbari German Tkachenko ochiq aytdi:
“SSKA rahbariyati uni olishni xohladi, murabbiylar shubha qilgan. Lekin bu har bir katta klubda uchraydigan holat. Abbos esa o‘z o‘yini va mehnati bilan hamma shubhalarni yo‘qqa chiqardi”.
2023 yilning avgustida “Paxtakor”dan Moskva klubiga ko‘chgan 19 yoshli futbolchiga avval boshda ehtiyotkorona qaralgan bo‘lsa-da, u qisqa vaqt ichida SSKAning asosiy figurasiga aylandi. Jamoaning barcha hujumlari aynan Fayzullayev orqali tashkil etiladigan bo‘ldi. U Rossiya Premer-ligasining debyut mavsumidayoq asosiy kashfiyotlardan biri sifatida tilga olindi.
“Paxtakor” futbol maktabi tarbiyalanuvchisi bo‘lgan Abbosbek uchun bu muvaffaqiyatlar kutilmagan emas. U hamisha maydondagi intilish va barqaror rivojlanish bilan ajralib kelgan. SSKA ustiga 500 ming yevro to‘lagan bu transfer hozirda o‘zini to‘liq oqladi. Ayni vaqtda Transfermarkt portali futbolchini 8 million yevroga baholamoqda.
Bu ko‘rsatkich Markaziy Osiyodagi futbolchilar orasida ikkinchi yuqori baho hisoblanadi. Ro‘yxatda faqatgina “Manchester Siti” himoyachisi Abduqodir Husanov (35 mln yevro) oldinda turibdi.
Shubhalar ostida kelgan Abbosbek Fayzullayev o‘z mehnati, mehri va muhimi, maydondagi natijalari bilan barcha tanqidlarga javob berdi. U endi nafaqat O‘zbekiston, balki butun mintaqamizning futbol yuzidan biriga aylanmoqda. Yevropadagi kelajak transferi ham, ehtimol, uzoq emas.
