Taksistlarga hududiy faoliyat cheklovi joriy qilinadi

O‘zbekiston Respublikasi Transport vazirligi ijtimoiy tarmoqlarda taksistlarning faqat o‘z hududlarida faoliyat yuritishi bo‘yicha cheklovlar joriy etilishi haqida tarqalgan ma’lumotlarga rasmiy izoh berdi. Bu haqida Upl.uz xabar berdi.

Vazirlik matbuot xizmati rahbari Navruz Ashurmatov «Daryo» nashriga bergan intervyusida ushbu o‘zgarishlar haqiqiy ekanligini tasdiqladi va joriy etish jarayoni boshlanganini ma’lum qildi. Ashurmatovning ta’kidlashicha, marshrut taksilari uchun hududiy cheklov g‘oyasi yangi emas.

U 2011 yilda qabul qilingan 139-sonli qarorni eslatib o‘tdi. Mazkur qaror taksi faoliyatini tartibga solgan va haydovchilarning faqat litsenziyada ko‘rsatilgan hudud doirasida yo‘lovchilarni tashishi mumkinligini belgilagan (5-bob, 9-band).

Garchi bu qaror amaldan chiqqan bo‘lsa-da, 2025 yilda qabul qilingan yangi hujjat ushbu printsipni qayta tikladi va taksistlarni o‘z hududlariga bog‘lashni ta’minladi. Yangi qoidalarga muvofiq, taksist o‘z hududi va litsenziyada ko‘rsatilgan qo‘shni viloyatlar doirasida faoliyat yuritishi mumkin bo‘ladi.

Masalan, Toshkent raqamini olgan avtomobil (01) Toshkent shahri, Toshkent viloyati va Sirdaryo viloyatida ishlash huquqiga ega bo‘ladi. Boshqa hududlar uchun ham shunday tartib amalda bo‘ladi.

Bu choralar transport sohasidagi tartib-intizomni mustahkamlashga qaratilgan.