Indoneziyadagi qamoqxonadan 50 dan ortiq mahbus qochib ketdi (video)

Indoneziyaning Achex provinsiyasida joylashgan qamoqxonadan 50 dan ortiq mahbus qochib ketdi, deb xabar beradi The Telegraph.

Ijtimoiy tarmoqlarda tarqalgan kadrlarda erkaklar panjaralar ustidan oshib, ko‘cha savdogarlari yonidan yugurib o‘tayotgan tasvirlangan. Mamlakat g‘arbida joylashgan provinsiya aholisi qochoq mahbuslarni ushlashga uringan. Rasmiylarning ma’lumotlariga ko‘ra, hozirda 28 nafar mahbus ozodlikda qolmoqda.

Mahbuslar ovqat uchun navbatda turganida qochishni amalga oshirgan. Hozirda Indoneziya qamoqxonalari jiddiy muammoga duch kelgan — ularning aksariyati jinoyatchilarga to‘lib ketgan.

O‘tgan oy immigratsiya va axloq tuzatish muassasalari vaziri Agus Andrianto mamlakatdagi qamoqxonalarning 87 foizi to‘lgani haqida ogohlantirgan edi. Achexdagi voqeadan keyin vazir OAVga ushbu qamoqxona 100 kishiga mo‘ljallangani, ammo u yerda ayni vaqtda 368 nafar mahbus saqlanayotganini ma’lum qilgan.

Jazo muddatini o‘tayotgan mahbuslarning aksariyati giyohvand moddalar bilan bog‘liq ayblovlar uchun qamoqqa hukm qilingan. Hozirda qochoqlarni qidirish bo‘yicha atrofdagi barcha hududlar ko‘zdan kechirilmoqda, rasmiylar ozodlikda qolayotgan mahbuslarni yangi jazodan qochish uchun taslim bo‘lishga chaqirdi.