2 may, juma kuni Amerikaning CNN telekanali G‘arb razvedka xizmatlariga tayanib, Rossiya prezidenti Vladimir Putinning Ukrainaga qarshi urushdagi strategik yo‘nalishi haqida yangi ma’lumotlarni e’lon qildi.
Bayonotga ko‘ra, Putin hozirda uzoq muddatli g‘alabalar emas, balki qisqa muddatdagi taktik yutuqlar va iktisodiy bosimni yengillashtirishni maqsad qilmoqda.
Hududiy nazorat va harbiy sanoatni rivojlantirish ustuvor yo‘nalishga aylandi
Razvedka hisobotlariga ko‘ra, Kreml diqqatini bosib olingan Ukraina hududlari ustidan to‘liq nazorat o‘rnatish va ularni siyosiy-iqtisodiy jihatdan Rossiya tizimiga integratsiya qilishga qaratmoqda.
Bu bilan birga, Rossiyaning harbiy sanoatiga katta miqdordagi mablag‘lar yo‘naltirilmoqda. Bu, bir tomondan, frontdagi ehtiyojlarni ta’minlash, ikkinchi tomondan esa, sanksiyalar tufayli murakkab ahvolga tushgan ichki iqtisodiyotni rag‘batlantirish vositasi sifatida qaralmoqda.
“Bu Putin uchun urush foydaga ishlayapti, degan ishonchni kuchaytiradi”
CNN telekanali yozgan tahlilda qayd etilishicha, Putin G‘arb sanksiyalariga qaramasdan, o‘zini hozircha barqaror deb his qilmoqda va urush holati uning foydasiga ishlayotganiga ishonayotgan bo‘lishi mumkin.
“Putin hozir zaiflashgan Ukrainaga qarshi uzoqroq muddatli frontda harakat qilish imkoni bor, deb hisoblayapti. U butun mamlakatni to‘liq nazorat qilish uchun yetarli kuch va zaxiralarga ega, degan ishonchda”, — deyiladi CNN manbasi so‘zlarida.
Tramp omili: Kremlda tinchlik imkoniyati ko‘rilmoqda
Telekanalning ikki alohida manbasi ma’lum qilishicha, Putinning strategik yondashuvidagi so‘nggi o‘zgarishlarga AQSHdagi siyosiy jarayonlar ham ta’sir qilgan. Xususan, u prezident Donald Tramp va uning atrofidagi jamoa Ukraina bilan tinchlik kelishuvi yuzasidan muzokaralarga ochiq bo‘lishi mumkin, deb hisoblaydi.
Bu esa Kreml uchun strategik imkoniyat sifatida qaralmoqda. Tramp hokimiyatga kelganidan so‘ng Rossiya o‘z shartlarini ilgari sura oladigan vaziyat vujudga kelishi mumkin, degan umidlar shakllanmoqda.
Hozirgi vaziyatda Putinning urushga bo‘lgan yondashuvidagi ehtimoliy o‘zgarishlar xalqaro siyosatda yangi bosqichni boshlashi mumkin. Sizningcha, Rossiya iqtisodiy bosim ostida haqiqatan ham “qisqa yo‘l”ni tanlayaptimi yoki bu faqat taktik aldamchilikmi?
