Eron prezidenti qo‘shni davlatlardan uzr so‘radi
Eron prezidenti Mas’ud Pizishkiyon davlat televideniyesi orqali qilgan telemurojaatida mamlakatning xavfsizlik siyosati haqida muhim bayonotlar berdi. Bu haqda Zamin.uz xabar berdi.
U, ayniqsa, so‘nggi kunlardagi zarbalardan zarar ko‘rgan qo‘shni davlatlardan uzr so‘rashini ochiq aytdi. Prezidentning ta'kidlashicha, rahbariyat, qo‘mondonlar va talabalar "dushmanning hujumlari" oqibatida halok bo‘lgan.
Eronning qurolli kuchlari mamlakatni himoya qilish uchun barcha choralarni ko‘rganini ta'kidlab, qo‘shnilarga nisbatan pozitsiyasini alohida qayd etdi. Unga ko‘ra, Eron qo‘shni davlatlarga zarba bermoqchi emas, aksincha ularni "birodarlar" deb biladi va mintaqa tinchligi uchun birgalikda harakat qilishni xohlaydi.
Pizishkiyon Muvaqqat rahbariyat kengashi yig‘ilishida qabul qilingan qarorga ham to‘xtaldi. Unga ko‘ra, qo‘shnilar tomonidan Eronga hujum bo‘lmaguncha, ular hududidagi nishonlarga zarba berilmaydi va raketalar uchirilmaydi.
Tehron qo‘shnilar bilan to‘qnashuvni kengaytirishni istamayapti, faqat hujum manbai qo‘shni davlatlardan bo‘lgan taqdirda javob qaytarilishini bildirdi. AQSH prezidenti Donald Trampning "Eron so‘zsiz taslim bo‘lishi kerak" degan fikriga Pizishkiyon keskin javob berdi.
U bu g‘oyani "ular qabrgacha olib yuradigan orzu" deb atadi. Tehron nuqtayi nazaricha, bunday talablar real hayotga mos kelmaydi va qabul qilinmaydi.
Shuningdek, Pizishkiyon AQSH foydalanishga urinayotgan Iroq shimolidagi qurolli guruhlar mavzusiga ham to‘xtaldi. U qo‘shni davlatlarda turib, Eronga qarshi harakat qilayotgan guruhlarga murojaat qilib, ularni tashqi kuchlarning "imperializmi quroli"ga aylanmaslikka chaqirdi.
Bu telemurojaat Tehronning hozirgi vaziyatda ikki yo‘lni bir vaqtning o‘zida ushlab turishga urinayotganini ko‘rsatadi: bir tomondan — qattiq siyosiy pozitsiya va tashqi bosimga qarshi turish, ikkinchi tomondan — mintaqa qo‘shnilari bilan aloqani saqlab qolish va mojaroni kengaytirmaslik istagi. Endi asosiy savol shuki, bu bayonot amaliyotda qanchalik tez va qanday darajada amalga oshadi.
Bugungi mintaqa — bayonotdan ko‘ra tezroq o‘zgaradigan joy.
