Fоtо: Daily Mail.
Volfgang Amadey Motsart (1756–1791)ning yuz tuzilishi qanday bo‘lgan? Uzoq yillik bu jumboqqa javob izlagan olimlar buyuk bastakorning tashqi ko‘rinishini tiklashdi, deb Daily Mail xabar berdi.
Motsartning aksariyat saqlanib qolgan portretlari uning vafotidan so‘ng yillar o‘tib chizilgan bo‘lib, hayoti davomida yaratilgan suratlari esa bir-biridan keskin farq qiladi.
Yuz tuzilishini tiklash bo‘yicha sud-tibbiyot eksperti Tsitseron Moraesning aytishicha, boshqa bir loyiha ustida ishlayotganida, Motsartniki ekani aytilgan bosh chanoq tasodifan uning qo‘liga tushib qolgan. Tarixiy shaxslarning yuz tuzilishi ustida 10 yildan ortiq tadqiqot olib borgan Moraes va uning jamoasi fursatdan foydalanib ishga kirishdi.
"Bosh chanoq, pastki jag‘ va ayrim tishlarning yo‘qligini aytmaganda, yaxshi saqlangan edi. Yetishmagan qismlar statistik ma’lumotlar va anatomik moslik asosida tiklandi", — dedi Moraes.
Tadqiqotchilar avval bosh chanoqni virtual tiklashdan boshlashdi, so‘ng yuzni to‘liq tiklash uchun turli texnikalar qo‘llandi. Yumshoq to‘qimalar qalinligi markerlari va yuzlab yevropalik kattalarning o‘lchamlari asosida burun, lab, quloq va boshqa qismlar aniqlandi.
"Shuningdek, anatomiya deformatsiyasi texnikasi yordamida virtual donor boshini Motsart bosh chanoqiga mosladik. Bu esa mos keluvchi yuz qiyofasini yaratishga imkon berdi", — deya qo‘shimcha qildi mutaxassis.
