O‘zbekistonda investitsiya oqimi o‘smoqda: 2025 yilda 42 milliard dollarlik loyihalar rejalashtirilgan
Prezident Shavkat Mirziyoyevga 21 aprel kuni mamlakatda investitsiya sohasida joriy yil birinchi choragida amalga oshirilgan ishlar va navbatdagi ustuvor vazifalar yuzasidan axborot taqdim etildi.
Ilk chorakda o‘sish sur’ati yuqori
Ma’lumotlarga ko‘ra, 2025 yilning birinchi choragida O‘zbekistonda 8 milliard 700 million dollardan ziyod xorijiy sarmoya o‘zlashtirildi. Bu ko‘rsatkich o‘tgan yilning shu davriga nisbatan qariyb 20 foizga ko‘p.
Investitsiyalar asosan energetika, metallurgiya, kimyo, farmatsevtika, transport, qishloq va suv xo‘jaligi, shuningdek kommunal va ijtimoiy yo‘nalishlardagi loyihalarga yo‘naltirilgan. Bu orqali qo‘shilgan qiymat yaratish va yangi ish o‘rinlari tashkil qilishga jiddiy e’tibor qaratilmoqda.
2025 yil yakunicha 42 milliard dollarlik sarmoya rejada
Yilning birinchi yarmi oxirigacha 18 milliard dollardan ziyod investitsiya o‘zlashtirilishi kutilmoqda.
Joriy yilda esa umumiy hisobda 42 milliard dollarlik xorijiy sarmoya jalb etilishi rejalashtirilgan. Bu mablag‘lar evaziga:
- 81 ta yirik loyiha,
- 8 mingdan ortiq o‘rta va kichik loyihalar amalga oshirilishi mo‘ljal qilingan.
Har bir loyiha uchun alohida yechim — prezident topshiriqlari
Prezident mutasaddilarga har bir investitsiyaviy loyiha bo‘yicha anik manzilli ish olib borish, vazirliklar, hokimliklar va tarmoq rahbarlarini faol jalb etish orqali loyihalardagi barcha masalalarni o‘z vaqtida hal etish yuzasidan topshiriq berdi.
Shuningdek, jahon iqtisodiyotida yuz berayotgan tebranishlar sharoitida:
- Har bir xorijiy investor bilan yaqin ishlash,
- Sarmoyalarning qaytarimi va samaradorligini oshirish,
- Yangi loyihalarni tezkor amalga oshirish,
- Sanoatni diversifikatsiya qilish,
Yuqori daromadli ish o‘rinlari yaratish — asosiy vazifalardan biri ekani alohida qayd etildi.
Siz nima deb o‘ylaysiz: ushbu sarmoyalar qaysi sohalarga ko‘proq yo‘naltirilishi kerak? Yaqin yillarda qaysi sohalarda ish o‘rinlari ko‘payadi, deb o‘ylaysiz?
