Xorazmda Avstriya texnologiyasi bilan yomg‘irlatib sug‘orish yo‘lga qo‘yiladi: suv 40 foiz tejaladi

Prezident Shavkat Mirziyoyev Xorazm viloyatida bo‘lib o‘tgan yig‘ilish davomida Avstriyaning mashhur «Bauer» kompaniyasi bilan yomg‘irlatib sug‘orish texnologiyasini keng ko‘lamda joriy etish bo‘yicha muhim kelishuvga erishilganini ma’lum qildi.

Unga ko‘ra, ushbu zamonaviy texnologiyani dastlab sinov tariqasida mamlakatimizdagi 24 nafar fermerning 2,5 ming gektar maydonida tatbiq qilish natijasida suv iste’moli 40 foizga, mineral o‘g‘itlardan foydalanish 35 foizga, qo‘l mehnati sarfi esa 90 foizga kamaygan. Bundan tashqari, hosildorlik ko‘rsatkichi o‘rtacha 25 foizga oshgani kuzatilgan.

Bu tajriba loyihasi o‘z samarasini to‘liq isbotlaganidan keyin, endi Xorazmda katta hajmda — 7,5 ming gektar yerda ushbu texnologiyani keng joriy qilish rejalashtirilmoqda.

Mazkur loyiha doirasida fermerlarga jami qiymati 15 million yevro bo‘lgan zamonaviy yomg‘irlatib sug‘orish texnikalari yetkazib beriladi. Bu qurilmalar lizing asosida, milliy valyutada, juda qulay — yillik 2,5 foiz stavka bilan 10 yil muddatga ajratiladi.

Avstriya tomoni o‘zining yuqori sifatli texnikalari uchun 10 yil muddatga kafolat ham beryapti. Shu bilan birga, mahalliy fermer va mutaxassislarning ushbu texnikalardan to‘g‘ri foydalanishi uchun kompaniya ekspertlari bepul o‘quv kurslarini tashkil qiladi.

Prezident yig‘ilish davomida mutasaddilarga bu yilning o‘zidayoq 1,5 ming gektar maydonda qiymati 2 million yevro bo‘lgan loyihani tajriba tariqasida amalga oshirishni va 2025 yildan esa bu ko‘rsatkichni 7,5 ming gektarga yetkazishni topshirdi.

Mutaxassislarning fikricha, bu texnologiya nafaqat suv va mineral o‘g‘itlarni tejash, balki yerning unumdorligini saqlash va hosildorlikni yanada oshirish imkonini beradi. Bu orqali hududdagi fermer xo‘jaliklarining iqtisodiy samaradorligi keskin oshib, tabiat resurslari tejaladi va atrof-muhit muhofazasiga ham ijobiy ta’sir ko‘rsatadi.