Tesla aksiyalari 2024-yil oxiridan beri 40% ga arzonlashdi, so‘nggi kunlarda esa tushish tezlashdi, deb Bloomberg xabar bermoqda. Kompaniyaning Yevropadagi elektromobil savdolari deyarli ikki baravarga kamaygani haqida ma’lumot tarqalishi bu jarayonni yanada kuchaytirdi.
So‘nggi hafta davomida aksiyalar 17% ga pasaydi, bu esa Tesla avtomobil biznesining sekinlashayotganidan treyderlarning xavotirda ekanligini ko‘rsatadi. Kompaniya aksiyalarining o‘sishi nafaqat asosiy moliyaviy ko‘rsatkichlarga, balki investorlarning ishonchiga ham bog‘liq bo‘lgani uchun bu jiddiy muammo hisoblanadi.
Interactive Brokers bosh strategiyasi Stiv Sosnik:
"Juda yuqori baholangan aksiyalar bilan bog‘liq asosiy qiyinchilik – ularning qachon eng past narxga tushishini aniqlashdir. Tesla uzoq vaqt davomida an’anaviy baholash usullariga to‘g‘ri kelmaganligi sababli, uning aksiyalari asosan investorlarning kayfiyatiga bog‘liq."
2024-yilda Tesla bir qator muammolarga duch kelmoqda. AQShdagi prezidentlik saylovlaridan so‘ng aksiyalar o‘sdi, chunki investorlar Ilon Mask va Donald Tramp hamkorligi Tesla uchun foydali bo‘lishi mumkin deb hisoblagan edi. Biroq, yanvarda kompaniyaning choraklik yetkazib berish natijalari kutilganidan past bo‘lgani va so‘nggi 10 yil ichida ilk bor yillik savdolar kamaygani investorlarning ishonchini pasaytirdi.
Shuningdek, kompaniya kutilgan darajada foyda ololmagani va 2025-yil uchun savdo prognozlarini pasaytirgani haqida hisobot e’lon qilgan.
Buning natijasida Tesla’ning bozor qiymati $1 trilliondan pastga tushdi, bu kompaniyani Berkshire Hathaway va Broadcom’ning ortiga surib qo‘ydi.
Ayni paytda, Tesla uchun bozorni o‘zgartiradigan yirik yangiliklar kutilmayapti. Analitiklar to‘liq avtonom avtomobillar yaratish bo‘yicha kompaniyaning aniq rejalari haqida hech qanday e’lon yo‘qligini ta’kidlashmoqda.
Bundan tashqari, Maskning siyosatga ortiqcha qiziqishi investorlarni xavotirga solmoqda, chunki ular kompaniya rahbariyati biznesga ko‘proq e’tibor qaratishini istashadi.
Tesla aksiyalarining yuqori baholanishi ham xavf omili bo‘lib qolmoqda. Ularning bozor koeffitsiyenti S&P 500 kompaniyalari o‘rtacha darajasidan sezilarli darajada yuqori bo‘lib, aksiyalar joriy daromad ko‘rsatkichlariga nisbatan haddan tashqari qimmat baholanayotganini anglatadi.
Tesla’ning so‘nggi haftadagi tushishi umumiy bozor pasayishi fonida sodir bo‘ldi, chunki S&P 500 indeksi ham 5% ga pasaygan.
Barcha bu omillar natijasida, aksiyalar hozircha minimal narxga yetmagan deb hisoblayotgan investorlar savdodan chetga turibdi.
Treyderlarning xavfsizlik uchun bir oylik opsionlarga bo‘lgan talab keskin oshgani va bozorda Tesla aksiyalarining kelajakdagi pasayishiga tikilgan ko‘plab investorlar borligi ham buni tasdiqlaydi.
Payshanba kuni Tesla aksiyalari yana 3% ga arzonlashib, $280 gacha tushdi. Biroq, juma kuni premarket savdolarida aksiyalar 0,4% ga o‘sdi.
