Jamiyat yangiliklari

Prezident Shavkat Mirziyoyev 22 mart kuni Samarqandga tashrif buyurib, Imom Buxoriy maqbarasini ziyorat qildi. Qur’on tilovat etilib, duo o‘qildi. – Kuni kecha xalqimiz bilan Navro‘z ayyomini kutib oldik. Bugun, muqaddas Ramazon oyida mana shu tabarruk joyga kelib turibmiz. Bu ulug‘ kunlarga tinchlik-xotirjamlikda yetkazgani uchun Yaratganga shukronalar aytamiz. Ilohim, hamisha yurtimiz tinch, elimiz farovon bo‘lsin, hamma xayrli niyatlarimiz amalga oshsin. Bu majmuani Imom Buxoriy bobomizga munosib tarzda quryapmiz. U ziyorat bilan birga ma’rifat, tarbiya, ibrat o‘chog‘i bo‘lsin, dedi Shavkat Mirziyoyev. Qayd qilinishicha, bu yerda yangi majmua barpo etilmoqda, uning umumiy maydoni 44 gektar. Bugungi kunda mahobatli maqbara, 10 ming kishiga mo‘ljallangan masjid qurib bitkazilgan. Balandligi 75 metrlik 4 ta minora majmuaga ulug‘vorlik bag‘ishlagan. Shuningdek, muzey, ayvonlar, ma’muriyat va xizmat ko‘rsatish binolari barpo etilgan. Ayni paytda pardozlash ishlari olib borilmoqda. Bunda milliy an’analar va issiq ranglardan foydalanilmoqda. Peshtoqlar va ayvon devorlariga “Sahihi Buxoriy”dan hadislar bitiladi. Bundan tashqari, hududda ikki ming o‘rinli yigirmadan ortiq mehmonxona, xiyobonlar, to‘rtta tahoratxona barpo etiladi. Bu yil O‘zbekistonda Imom Moturidiy tavalludining 1155 yilligi keng nishonlanadi. Shu haqdagi prezident qarorida kalom ilmi sultonining Samarqand shahridagi majmuasini qayta ta’mirlash va obodonlashtirish belgilangan. Tashrif chog‘ida prezidentga ushbu loyiha taqdimot qilindi. Qayd etilganidek, Moturidiy majmuasida 1 ming 500 kishiga mo‘ljallangan jome masjid, ma’muriy bino qurilishi ko‘zda tutilgan. U yerda kutubxona, majlislar zali, innovatsion muzey hamda mutaxassislar uchun xonalar bo‘ladi. Majmua yaqinida ziyoratchilar uchun avtoturargoh, tahoratxona quriladi. Imom Abu Mansur Moturidiy islom olamida ixtiloflar avj olib, har xil firqalar ko‘paygan paytda yashagan, butun hayotini islomiy aqidani himoya qilish va ma’rifatini yoyishga bag‘ishlagan. U zotning moturidiylik ta’limoti, “Ta’vilotul Qur’on”, “Kitob at-Tavhid” kabi asarlari bag‘rikenglik va mo‘tadillik tamoyillari bilan ahli sunna val-jamoaning ma’naviy asoslariga aylangan. Davlat rahbari bu tamoyillar bugungi kunda ham dolzarb bo‘lib borayotganini ta’kidlab, alloma merosini yanada keng o‘rganish va jahonga targ‘ib etish, majmuaga keluvchilarga sharoitlarni kengaytirish bo‘yicha ko‘rsatmalar berdi. Yana bir xayrli loyiha – Oqdaryo tumanidagi Mahdumi A’zam qadamjosini obod qilishga qaratilgan. Asli hozirgi Kosonsoy tumanida tug‘ilgan so‘fiy olim naqshbandiya ta’limotining rahnamolaridan biri bo‘lgan. Ilm va din yo‘lidagi uzoq safardan so‘ng, Samarqand viloyatida abadiy qo‘nim topgan. Bu maskanga keluvchi ziyoratchilar ham ko‘p. Ularga sharoitlarni yaxshilash maqsadida Mahdumi A’zam maqbarasi yonida uch qavatli avtoturargoh, tahoratxona qurilishi rejalashtirilmoqda. Samarqand zaminidan yetishib chiqqan boshqa olim va mutafakkirlar, aziz avliyolarning qadamjolari ham bosqichma-bosqich qayta ta’mirlanib, obod qilinadi.

Yevropa Ittifoqi (EI) davlatlarining O‘zbekistondagi elchilari Navro‘z bayrami munosabati bilan o‘zbekistonliklarga original tabrik yo‘lladi. Tabrik videolavha shaklida tayyorlanib, unda Chexiya, Germaniya, Fransiya, Italiya, Latviya, Vengriya, Ruminiya, Slovakiya elchilari, shuningdek, Bolgariya va Ispaniyaning muvaqqat ishlar vakillari ishtirok etdi. Ular sharqona yangi yilni nishonlab, o‘zbek tilida she’r o‘qidilar. EIning O‘zbekistondagi elchisi Toyvo Klaar esa nafaqat she’r o‘qidi, balki musiqiy ijroga ham hamrohlik qildi. U o‘zining chiqishida qo‘biz cholg‘usini targ‘ib etib, ushbu qadimiy so‘zning mohiyatini yoritib berdi. Diplomatlar ijrosidagi she’rda quyidagi satrlar aks etdi: Ona yer taftidan g‘uncha gul ochar, Gullar qo‘shiq kuylab hidlarin sochar, Yaproq chapak chalgach, bolari qochar, Navro‘z ayyomingiz muborak bo‘lsin! EI diplomatlarining mezbon mamlakatga ehtirom ramzi sifatida o‘zbek tilida tabrik yo‘llashi yaxshi an’anaga aylanmoqda. Avvalroq, 21 oktyabr – O‘zbek tili bayrami munosabati bilan ham shunday videoqutlov yo‘llangan edi.

Taniqli aktyor va sharhlovchi Alisher Uzoqov o‘zining (X) Tvitter sahifasi orqali videomurojaat bilan chiqdi. U bugungi futbol uchrashuvi va uning sharhi haqida fikr bildirdi hamda o‘ziga nisbatan bildirilayotgan munosabatlarga izoh berdi. "Kechagi o‘yinda qiziq holat bo‘ldi" Uzoqov videomurojaatida kechagi O‘zbekiston – Qirg‘iz Respublikasi terma jamoalari o‘rtasidagi o‘yin davomida yuz bergan qiziq holat haqida gapirdi. U o‘sha paytda stadion ekranida chiroyli va istarali bir qiz tasvirlanganini va shundan so‘ng: "Bu o‘yindan ko‘ra mana shu singlimizni ko‘rsatsalaring yaxshi" degan fikr bildirganini eslab o‘tdi. "Oilasi mening oldimga keldi" Bugun kechqurun uning oldiga o‘sha qiz, uning otasi va akasi kelgan. Ular Uzoqovdan bu gapi uchun izoh so‘rashgan va ijtimoiy tarmoqlarda ushbu holatga bildirilayotgan munosabatlar qizga qattiq ta’sir qilganini bildirishgan. "Shu fursatdan foydalanib, bu singlimizning oilasidan chin qalbimdan uzr so‘rayman. Agar ko‘ngillariga teggan bo‘lsam, uzr!. Chunki o‘zimni ham qiz farzandim bor va bu holat qanchalik og‘ir botishini his qilaman." "Bunday targ‘iblar noto‘g‘ri" Shuningdek, Uzoqov ushbu holatni "boshqa noto‘g‘ri yo‘nalishda targ‘ib qilmaslikka" chaqirar ekan, shunday dedi: "Bu qizni o‘z singlim deb bilaman, uni himoya qilishga tayyorman. Iltimos, bu masalani ortiqcha tarzda muhokama qilmanglar." Alisher Uzoqovning mazkur videomurojaati jamoatchilik orasida katta qiziqish uyg‘otdi. U boshlanib ketgan mojaroni yumshatish va befarq emasligini ko‘rsatish uchun izoh berishni lozim topdi. Ayni damda, ijtimoiy tarmoqlarda ushbu holat bo‘yicha turli fikrlar bildirilmoqda, ammo Uzoqov o‘z munosabatini ochiqchasiga ifoda etib, uzr so‘radi.

Shavkat Mirziyoyevning topshirig‘iga muvofiq, Navro‘z bayrami va yaqinlashib kelayotgan Ramazon hayiti munosabati bilan Afg‘oniston insonparvarlik yordami yetkazildi. Bu haqda Surxondaryo viloyati hokimligi xabar berdi. Qayd etilishicha, Afg‘oniston aholisi uchun mo‘ljallangan qariyb 200 tonna oziq-ovqat mahsuloti ortilgan yuk Balx viloyatiga yetkazilgan. Qo‘shni mamlakatga yetkazilgan zarur oziq-ovqat mahsulotlari Hayraton shahridagi Astras kompaniyasi hududida O‘zbekiston prezidentining Afg‘oniston bo‘yicha maxsus vakili Ismatilla Irgashev, Surxondaryo viloyati hokimi Ulug‘bek Qosimov, shuningdek, tegishli vazirliklari mutasaddilari hamda Balx viloyati gubernatori Muhammad Yusuf Vafo hamda ikki tomon rasmiylari ishtirokida topshirilgan. Insonparvarlik yordami tarkibidan un, bug‘doy, makaron mahsulotlari, o‘simlik yog‘i, shakar, tez tayyorlanadigan taomlar, qizil loviya va mosh o‘rin olgan. Shuningdek, Mozori Sharif shahrida ikki tomonlama uchrashuv o‘tkazilib, kelgusidagi hamkorlik aloqalarini rivojlantirish masalalari muhokama qilingan. Suhbat davomida O‘zbekiston tomonidan Afg‘onistonda barpo etilayotgan Imom Buxoriy maqbarasi qurilishi haqida ham alohida fikr almashilgan. Afg‘oniston rasmiylari O‘zbekiston prezidenti va xalqiga ko‘rsatayotgan yordam uchun minnatdorchilik bildirib, yaqinlashib kelayotgan Ramazon hayiti munosabati bilan samimiy tabriklarini yo‘llagan. Tashrif davomida amalga oshirilayotgan yangi loyihalar bilan ham tanishilgan.

21 mart kuni, Navro‘z bayramida, Levi's® brendi rasman O‘zbekistonga qaytadi. Uzoq tanaffusdan so‘ng kompaniya to‘liq yangilanishdan o‘tdi va endi yangi jamoa boshchiligida o‘z eshiklarini moda ixlosmandlari uchun qayta ochmoqda. Levi's® qayta ishga tushirilishining asosiy farqi - bu O‘zbekiston bozorida ilgari taqdim etilmagan noyob konsepsiya va dizaynerlik yondashuvi. Yangi Levi's® - shunchaki kiyim-do‘kon emas, balki moda, san’at va innovatsiyalar bilan boyitilgan haqiqiy fashion-makon bo‘ladi. Levi's® yangi formatda: kiyimdan ham ko‘proq Levi's® qaytishi - bu faqat brendning qayta ochilishi emas, balki uning falsafasining to‘liq yangilanishidir. Yangi jamoa jahon trendlaridan ilhomlanib, ularni aynan O‘zbekiston auditoriyasiga moslashtirdi. Asosiy g‘oya – kiyim shaxsiy ifodaning davomiga aylanishi va har bir xaridor o‘ziga mos uslubni topishi mumkin bo‘lgan makonni yaratishdir. Yangi Levi's® ning asosiy o‘ziga xosliklari: Dizaynga tamoman yangi yondashuv - kolleksiyalar zamonaviy moda yo‘nalishlarini hisobga olgan holda yaratilgan, lekin o‘ziga xoslikni saqlab qolgan. Eksklyuziv materiallar va sifatli fasonlar - qulaylik va dizaynga alohida urg‘u berilgan. Konseptual do‘kon intereri - har bir detal muhim ahamiyatga ega. Cheklangan kolleksiyalar - bu mahsulotlarni oddiy do‘konlardan topish qiyin. Tashkent City Mall - yangi Levi's® uchun ideal joy Yangi Levi's® ning ochilishi uchun Tashkent City Mall tanlandi. Bu nafaqat O‘zbekistondagi eng yirik savdo markazlaridan biri, balki modasevarlar va trend kuzatuvchilari uchun eng muhim manzillardan biri hisoblanadi. Nima uchun aynan Tashkent City Mall? Dunyoning yetakchi brendlari shu yerda joylashgan - bu esa Levi's® ning moda ixlosmandlari e’tibor markazida bo‘lishini ta’minlaydi. Innovatsion interer va zamonaviy dizayn - bu yangi Levi's® konsepsiyasi bilan uyg‘unlashadi. Navro‘z va yangi boshlanish Ochilish sanasi bejiz tanlanmagan - 21 mart, Navro‘z bayrami kuni. O‘zbek madaniyatida bu kun yangilanish, qayta tug‘ilish va yangi davr boshlanishi bilan bog‘liq. Aynan shuning uchun Levi's® ochilishi ham O‘zbekiston bozoridagi yangi davr boshlanishini ifodalaydi. Tadbir mehmonlari yangi kolleksiyadagi eksklyuziv mahsulotlarni birinchilardan bo‘lib xarid qilish, shuningdek, bayramona muhitdan bahramand bo‘lish imkoniyatiga ega bo‘ladilar. Ochilishga bag‘ishlangan maxsus aksiyalar: 1 dona mahsulot xaridida - 10% chegirma 2 dona mahsulot tanlovida - 15%chegirma 3 dona mahsulot xaridida - 20%chegirma 21 mart kuni Tashkent City Mall, 1-qavatdagi Levi's® ochilishini o‘tkazib yubormang - yangi fashion-tarixning bir qismiga aylaning! Levi's® yangiliklari va maxsus takliflarini kuzatib boring: Telegram: Instagram: @lev__uzbekistan Facebook:

Migratsiya agentligi direktori o‘rinbosari Azim Husanov va New Future Success Academy xalqaro hamshiralarni tayyorlash o‘quv markazining O‘zbekistondagi boshqaruvchi menejeri Fozilbek Xonxo‘jayev o‘rtasida uchrashuv bo‘lib o‘tdi. Unda Amerika standartlari bo‘yicha hamshiralarni test sinovlariga tayyorlash markazini mamlakat hududida ochish va imtihon markazini tashkil qilish, (MDH va qo‘shni davlatlarda yagona markaz bo‘ladi) muvaffaqiyatli o‘tgan nomzodlarni AQSHda bandligini ta’minlash masalasi muhokama qilindi. 2030 yilgacha AQSHda 1 milliondan ortiq hamshiralarga talab mavjud. Oliy malakali hamshiralarga yiliga 44 mingta qonuniy ishchi viza ajratiladi. Uchrashuv yakunida New Future Success Academy kompaniyasi va Migratsiya agentligi o‘rtasida tibbiyot sohasida nomzodlarni tayyorlash bo‘yicha memorandum imzolandi.

Shavkat Mirziyoyev 21 mart kuni Yangi O‘zbekiston bog‘ida bo‘lib o‘tayotgan Navro‘z shodiyonasida nutq so‘zlab, O‘zbekiston xalqini bayram bilan tabrikladi. O‘zbekiston prezidenti Shavkat Mirziyoyev Navro‘z umumxalq bayramiga bag‘ishlangan tantanali marosimda nutq so‘zladi. Tabrik nutqi prezident matbuot xizmati tomonidan e’lon qilindi. "Bugungi munavvar kunni elu yurtimiz bilan tinch va xotirjam kutib olayotganimiz uchun Yaratganga cheksiz shukronalar aytamiz. Bu yilgi Navro‘z muqaddas Ramazon oyida, uning tabarruk fazilatlariga uyg‘un holda o‘tayotgani bayramga alohida ruh, o‘zgacha fayz va quvonch bag‘ishlamoqda. Qalblarimiz shodlikka to‘lgan shunday barakatli kunlarda yurtimiz mo‘min-musulmonlarini, butun islom ummatini Ramazoni sharif bilan yana bir bor qutlab, jamiki pok niyatlarimiz ijobat bo‘lishini tilaymiz. Xorijiy mamlakatlarda ona yurt mehri va sog‘inchi bilan yashayotgan vatandoshlarimizni ham chin dildan tabriklab, samimiy tilaklarimizni izhor etamiz", deydi prezident. Ma’lum qilinishicha, Navro‘zi olam 3 ming yillik davlatchilik tarixida o‘zining beqiyos ma’naviy ahamiyati bilan hamisha alohida e’tibor topgan buyuk bayramdir. Ushbu bebaho ayyom haqida bitilgan ilmiy-tarixiy va badiiy asarlar shu qadar ko‘pki, ular haqli ravishda milliy merosimizning o‘lmas durdonalariga aylangan. "Xalqimiz asrlar davomida og‘ir va mashaqqatli, sinovli paytlarda ham bu bayramni olijanob tabiati va qadriyatlari bilan asrab-avaylab kelgani chinakam mo‘jizadir. Navro‘zning betakror go‘zalligi, insonparvarlik ruhi va teran falsafasi globallashuv davrida ham butun bashariyatni hayratga solayotgani uning azaliy mohiyati va hayotbaxsh kuchidan dalolat beradi. Ayniqsa, insonning tabiat va borliq bilan uyg‘unligi, yaratuvchanlik ishtiyoqi, g‘ayrat va shijoati, o‘zaro hamjihatlik, mehr-oqibat va saxovat kabi olijanob fazilatlari Navro‘z timsolida yanada yorqin namoyon bo‘ladi. Navro‘z kunlarida bobo dehqonlarimiz rizq-ro‘zimiz, dasturxonimiz qut-barakasini o‘ylab, ona zaminga o‘z mehrini beradi, mo‘l hosil olish niyatida qattiq bel bog‘laydi. Shu ma’noda, Mir Alisher Navoiy bobomizning “Dehqonki, dona sochar, yerni yormoq bilan rizq yo‘lin ochar” degan so‘zlarida chuqur hayotiy ma’no mujassam. Ko‘nglimizda mehnat va ijod, uyg‘onish va yasharish zavqi tobora kuchayib borayotgan mana shunday bahoriy lahzalarda mirishkor dehqon va fermerlarimiz, bog‘bon va chorvadorlarimizga alohida ehtirom izhor etamiz", dedi davlat rahbari. Bildirilishicha, bugun mamlakatda inson qadrini ulug‘lash, ijtimoiy adolat tamoyillarini mustahkamlash, aholi daromadlari va turmush darajasini yuksaltirish yo‘lida qat’iy qadamlar qo‘yilmoqda. "Yurtimizda ko‘plab zamonaviy sanoat majmualari, infratuzilma va logistika tarmoqlari, avtomobil va temiryo‘llar barpo etilmoqda. Biznes, “Ay-ti” va turizm sohalari jadal rivojlanmoqda. Minglab yangi imorat va uy-joylar, bog‘cha va maktablar, oliygohlar, shifoxonalar, madaniyat va sport maskanlari bunyod etilmoqda. Shahar va qishloqlarimiz, butun yurtimiz qiyofasi tobora go‘zal va obod bo‘lib bormoqda. “Yashil makon” umummilliy loyihasi doirasida diyorimizda yangi ekologik muhit yaratilmoqda. Har yili millionlab ko‘chatlar ekish, yashil bog‘lar barpo etish, hayvonot dunyosini asrab-avaylash, har bir qarich yerdan unumli foydalanish kabi yuksak ekologik madaniy qadriyatlar kundalik hayotimizning ajralmas qismiga aylanmoqda. “Atrof-muhitni asrash va “yashil” iqtisodiyot yili” davlat dasturi doirasidagi ulkan ishlarimiz bu jarayonlarni yanada yuqori bosqichga olib chiqishiga aminman", dedi Shavkat Mirziyoyev. Ta’kidlanishicha, bugun mamlakatdagi yuqori texnologik korxonalarni boshqarayotganlar – asosan bilimli va malakali yoshlar. "Tadbirkorlik rivojiga yangi kuch va shiddat berayotgan ham aql-idrokli, serg‘ayrat va ishbilarmon o‘g‘il-qizlarimizdir. Sarhadlarimizda doimo sergak turgan askar va ofitserlar ham mard va jasur o‘g‘lonlarimizdir. Ilm-fan, madaniyat, adabiyot va san’at sohalarida Vatanimizni dunyoga tarannum etayotganlar ham yoshlardir. Xususan, yurtimizni jahonga mashhur qilishda yosh sportchilarimizning alohida o‘rni va hissasi bor. Xalqimizga har tomonlama munosib bo‘lgan bunday navqiron avlodimizga shon-sharaflar bo‘lsin! Aziz farzandlarim, sizlar Vatanimiz osmonida yorqin yulduzlar bo‘lib porlaydigan vaqt keldi. Bu ulug‘ maqsad yo‘lida mana shu Navro‘z faslida tavallud topgan Abduxoliq G‘ijduvoniy, Bahouddin Naqshband, Mirzo Ulug‘bek, Zulfiyaxonim, Ozod Sharafiddinov, Abdulla Oripov kabi mutafakkir zotlar sizlar uchun chinakam ibrat namunasidir. Yurtimizdagi beqiyos imkoniyatlarni amaliy natijalarga aylantirish uchun tinimsiz harakat qiling! Qayerda bo‘lmang, qaysi sohada ishlamang, milliy qadriyatlarimizga, o‘zligimizga, Vatanimizga munosib va sodiq bo‘ling! Hech qachon unutmangki, ortingizda salkam 38 millionlik buyuk xalq, Prezident turibdi. Sizlarga doimo omad va zafarlar yor bo‘lsin!" - dedi prezident. Qayd etilishicha, Navro‘zning betakror sehru jozibasi, eng avvalo, to‘qqiz yarim mingga yaqin mahallamizda o‘tkazilayotgan xalq sayillarida, bayram tantanalarida o‘z ifodasini topadi. Ko‘p ming yillik an’analar va zamonaviy qadriyatlarni o‘zida mujassam etgan mahalla tizimining hayotidagi o‘rni va ta’siri tobora ortib bormoqda. Ayniqsa, turli muammo va masalalar mahallaning o‘zida hal etilayotgani islohotlar xalqchilligi va natijadorligini keskin oshirmoqda. Yoshlar tarbiyasi, osoyishtalikni ta’minlash, kambag‘allikni qisqartirish, aholini tadbirkorlikka jalb etish, ijtimoiy himoya va xotin-qizlar faolligini kuchaytirish, ekologiya va obodlik kabi biri-biridan muhim vazifalar mahalla yettiligi tizimi orqali samarali yechim topmoqda. "Ma’lumki, bu yil yurtimizda mahalla raislari saylovlari bo‘lib o‘tadi. Xalqimiz ushbu mas’uliyatli jarayonda fidoyi va vatanparvar yurtdoshlarimiz uchun ovoz beradi, deb ishonaman. Mahallalarni har tomonlama rivojlantirish bundan buyon ham e’tiborimiz markazida bo‘ladi. Fursatdan foydalanib, ertaga – 22 mart kuni mamlakatimizda keng nishonlanadigan Mahalla tizimi xodimlari kuni bilan barcha yurtdoshlarimizni, mahalla faollarini samimiy tabriklab, ularning sharafli faoliyatida ulkan yutuqlar tilayman", dedi davlat rahbari. Navro‘z azaldan xalqning milliy va umumbashariy qadriyatlarga, dunyoviy davlat tamoyillariga, bag‘rikenglik, chin do‘stlik va hamkorlik g‘oyalariga sodiqligining yaqqol ramzidir. Bu ayyom yurtdagi barcha millat va elat vakillari uchun sevimli, tom ma’noda umumxalq bayramiga aylangan. "Mana shu quvonchli lahzalarda butun xalqimizga murojaat qilib aytmoqchiman: bizning kuchimiz – birlik va ahillikda, qudratimiz – Vatanga mehr va sadoqatda, yutug‘imiz – o‘zimizga bo‘lgan yuksak ishonchimizda! Navro‘z Birlashgan Millatlar Tashkiloti tomonidan xalqaro bayram sifatida e’tirof etilgani bizga alohida mamnuniyat bag‘ishlaydi. Navro‘zi olam hozirgi kunda barcha elu elatlarni, jumladan, Markaziy Osiyo xalqlarini yanada jipslashtirmoqda. Bugungi imkoniyatdan foydalanib, bepoyon mintaqamizda yashayotgan jamiki sof niyatli insonlarni el-yurtimiz nomidan qizg‘in tabriklayman. Tom ma’noda do‘stlik, qardoshlik va hamkorlik makoniga aylanayotgan mintaqamiz hamisha tinch bo‘lsin, hamisha gullab-yashnasin! Shu o‘rinda mintaqamizning hurmatli ziyolilari, ilm-fan, madaniyat, san’at va adabiyot namoyandalariga murojaat qilib aytmoqchiman. Aziz do‘stlar, sizlar noyob iste’dodingiz, aql-tafakkuringiz bilan azaliy qardoshligimizni, mushtarak qadriyat va urf-odatlarimizni, ezgu intilishlarimizni tarannum etadigan asarlar yaratib, yoshlarimizni ayni shu ruhda tarbiyalashga hissa qo‘shsangiz, xalqlarimiz sizlardan albatta minnatdor bo‘ladi. Bunday barkamol ijod namunalari bugungi tahlikali davrda ellarimiz, ayniqsa, yosh avlodlarimizga mustahkam ma’naviy qalqon bo‘lib xizmat qilishi shubhasiz. Shu oy oxirida qadimiy Xo‘jand shahrida O‘zbekiston, Tojikiston va Qirg‘iziston yetakchilarining uch tomonlama uchrashuvi mana shu yo‘lda yana bir amaliy qadam bo‘ladi, deb ishonaman", dedi Shavkat Mirziyoyev.

Foto: Videodan kadr Instagram'da “Gelik” avtomobilining oynalari sindirib ketilgani haqida er-xotin videosi tarqaldi. Unda ayol “Gelik” rusumli avtomobili oynalarini kimdir sindirib ketgani, bu uchun ichki ishlar organlariga murojaat qilishini aytib yig‘lagan. Uni turmush o‘rtog‘i tasvirga olgan. Shundan keyin er-xotinning uzr so‘rab chiqqan 2-videosi tarqaladi. Videoga ko‘ra, ulardan ichki ishlar organlari uzr so‘rattirishgan. Juftlik oldingi video hazil tariqasida olingani, bundan afsusda ekanini aytgan. “Uchtepa tumanida yashaymiz. 2 kun oldin mashinamizning old oynasi singandi. Bu kishi (turmush o‘rtog‘i) almashtiraman deganlari uchun qarindoshlarimizga prank qilaylik degan maqsadda old oynasini o‘zimiz sindirdik va uni video qilib, men Instagram'imga qo‘ydim. Bu noto‘g‘ri ma’noda hamma joyga tarqaldi. Buning uchun ichki ishlar xodimlaridan va buni noto‘g‘ri tushungan insonlardan uzr so‘raymiz. Biz buni o‘zimiz uchun qilmoqchi edik, bu qonuniy emas ekan”, – degan ayol.

Shavkat Mirziyoyev poytaxtimizning Bektemir tumaniga tashrifi chog‘ida Iykota mahallasida bo‘lib, qurilish va obodonlashtirish ishlari bilan yaqindan tanishdi, deb xabar beradi Prezident matbuot xizmati. Qayd etilishicha, bu yerdagi 37 ta ko‘p qavatli uy va 1 ming 400 ta hovlida 6 mingga yaqin aholi istiqomat qiladi. O‘tgan yili uch qavatli mahalla idorasi foydalanishga topshirilgan edi. Endi davlat budjeti hisobidan 358-umumta’lim maktabi qurilgan. Prezident ushbu yangi muassasani ko‘zdan kechirdi. Qariyb ming o‘rinli maktabda fan xonalari, kompyuter va xorijiy til xonalari, robototexnika to‘garagi, laboratoriya zarur o‘quv jihozlari bilan ta’minlangan. Kutubxona, sport zali, futbol maydoni va oshxonada bolalar uchun keng qulayliklar yaratilgan. Pedagoglar bilan muloqot chog‘ida bolalarning qobiliyatini to‘g‘ri shakllantirish, kasbiy ta’limni rivojlantirib, bitiruvchilarni kasb-hunarli qilib hayotga yo‘llash muhimligi ta’kidlandi. Xususan, axborot texnologiyalari, robototexnika, muhandislik kabi yo‘nalishlarni kengaytirish, o‘smirlarda harbiy-vatanparvarlik ruhini kuchaytirish vazifalari ko‘rsatib o‘tildi. «Mahalladagi yangi uylarning birinchi qavatlarida ikkita xususiy bog‘cha tashkil etilgan. Ular Navro‘z arafasida ochilgani ota-onalar uchun bayramona tuhfa bo‘ldi. Mahallada 70 ta savdo va xizmat ko‘rsatish shoxobchasi, 2 ta ishlab chiqarish korxonasida ko‘pchilik ro‘zg‘or tebratyapti. Prezidentimiz farmoyishi bilan e’lon qilingan dolzarb bir oylik doirasida tomorqadan unumli foydalanish, qishloq xo‘jaligi ekinlari ekish qizg‘in davom etmoqda», — deyiladi xabarda.

O‘zbekistonning mashhur xonandasi Munisa Rizaeva o‘zining yaqinda sotib olgan $1,500,000lik hovlisida bloger Jahongirni mehmon qildi. Jurnalist uning uyini aylanish davomida qiziqarli savollar bilan muhokamaga tortishga harakat qildi. Munisa yangi uyiga ko‘chib kelganini va hali barcha jihozlar to‘liq o‘rnatilmaganini ta’kidlab, Jahongir bilan hazillashdi: "Siz darrov chopib keldingiz, Siz yomonsiz!" Bloger esa bunga javoban "Uch yil oldin, erga tegib farzandli bo‘lsangiz mehmonga kelamiz deb kelishgan edik. Va’daga vafo qildik!" dedi. Munisa buni tasdiqlab, "15 yil ichida uch marta intervyu bergan bo‘lsam, ikkitasi sizga tegishli" deya kuldi. Suhbat davomida xonanda hovlining loyihasi, ichki dizayni va shaxsiy hayoti haqida gapirdi. Hovli oldida turgan qimmatbaho mashinalar ham diqqat markazida bo‘ldi.

Vazirlar Mahkamasining 2018 yil 6 oktyabrdagi 808-son Qarori bilan tasdiqlangan “Alimentlarni oldindan to‘lash, shuningdek, aliment to‘lash majburiyatini ta’minlash bo‘yicha garov shartnomasini tuzish tartibi to‘g‘risida”gi Nizomning 9-bandida alimentlarni besh yildan kam bo‘lmagan muddat uchun oldindan to‘lash mumkinligi ko‘rsatilgan. Qonunchilikdagi mazkur tartib Byuroning Xonqa tumani bo‘limi xodimlari tomonidan ham aliment to‘lovchi fuqarolarga muntazam tushuntirib borilmoqda. Natijada, xonqalik fuqaro ixtiyoriy ravishda farzandi uchun 5 yillik aliment pullarini to‘lab berdi. Xususan, fuqarolik ishlari bo‘yicha Urganch tumanlararo sudining 27.06.2024 yildagi ijro hujjatiga asosan qarzdor R.R.dan undiruvchi F.D. foydasiga voyaga yetmagan bir nafar farzandining moddiy ta’minoti uchun aliment undirish belgilangan. Davlat ijrochisining tushuntirish ishlari natijasida qarzdor R.R. bir nafar farzandining ta’minoti uchun 2025 yil mart oyidan 2030 yil mart oyiga qadar hisoblangan 132.270.000 so‘m aliment pullarini to‘lab berdi.

Davlat xavfsizlik xizmati xodimlari tomonidan bojxona idoralari bilan hamkorlikda Toshkent viloyatining Toshkent tumanida joylashgan “Navoiy” chegara-bojxona postida tezkor tadbir o‘tkazildi. Tadbir jarayonida mamlakatimizdan qo‘shni davlat tomon harakatlanayotgan “Lasetti” rusumli avtomashina to‘xtatilib, xolislar ishtirokida ko‘zdan kechirilganda, unda yo‘lovchi sifatida ketayotgan, Toshkent tumanida yashovchi fuqaroga tegishli sellofan paketda 874 ming AQSH dollari borligi ma’lum bo‘ldi. Aniqlanishicha, u mazkur pul mablag‘ini deklaratsiyasiz, bojxona nazoratidan yashirib, Qozog‘istonga olib o‘tmoqchi bo‘lgan. Shuningdek, tezkor tadbir davom ettirilib, ushbu xorijiy valyutalarni Toshkent shahridagi bozorlarda savdo qiluvchi shaxslardan yig‘ib, mazkur ayolga bergan – poytaxtda istiqomat qiluvchi fuqaroning Toshkent tumanidagi vaqtincha yashash xonadoni ko‘zdan kechirilganda, kelgusida Qozog‘istonga olib o‘tish uchun tayyorlab qo‘yilgan 399 ming 170 AQSH dollari borligi ham aniqlandi. O‘tkazilgan tezkor tadbir davomida jami 1 mln 273 ming 170 AQSH dollari ashyoviy dalil sifatida olindi. Hozirda mazkur shaxslarga nisbatan Jinoyat kodeksining 25,182-moddasining 2-qismi “a” bandi bilan jinoyat ishi qo‘zg‘atilib, qamoq ehtiyot chorasi qo‘llandi. Tergov harakatlari olib borilmoqda.

Majburiy ijro byurosi Namangan viloyat boshqarmasi va uning hududiy bo‘limlari tomonidan nomulkiy tusdagi hujjatlar ijrosini ta’minlash borasida tegishli chora-tadbirlar ko‘rilmoqda. Bunda asosiy e’tibor taraflarga sud qarorida ko‘rsatilgan majburiyatlarni o‘z vaqtida ta’minlash, ularning bu borada huquqiy madaniyatini oshirishga qaratilgan. Lekin ayrim hollarda, qarzdorlar majburiyatlarga ma’suliyatsiz bilan yondashayotgani tufayli oxir- oqibat ish majburiy ijro harakatlariga bormoqda. Xususan, Byuroning Chust tuman bo‘limi tomonidan ham uyga kiritish bilan bog‘liq hujjat ijrosi ta’minlandi. Aniqlanishicha, fuqarolik ishlari bo‘yicha Chust tumanlararo sudining 06.01.2025 yildagi hal qiluv qaroriga ko‘ra da’vogor M. S. ning 3 nafar farzandi bilan tumanidagi Qoraqo‘rg‘on mahalla fuqarolar yig‘inidagi uyning 2 ta xonasi va boshqa yordamchi binolardan foydalanish huquqi bilan kiritib qo‘yish belgilangan. Lekin, qarzdor ijro muddatida majburiyatni bajarmagani uchun ijro harakatlari olib borildi. Davlat ijrochisi hamda tegishli tashkilotlar hamkorligida olib borilgan majburiy ijro harakatlaridan so‘ng kelin farzandlari bilan uyga kiritib qo‘yilishi ta’minlandi. Shu bilan amalda ijro hujjati tamomlandi.

Keyingi paytlarda qayerga qarasam tadbir, ma’raka, gap-gashtak. Kuni kecha qishloqqa borsam u yerda ham shu gap. Iftorlikka «birrovga kirdim, bu yerdan chiqib ovsinlarning «gap»iga borishimiz kerak», deydi biri, yana biri ikki kundan keyin akasi iftorlik qilmoqchi ekanini aytadi. Turli «...dosh»lar guruhida ham shu mavzu – falon joyga mehmonga bordim, iftorlik qilayapman, bir yig‘ilmaymizmi yoki gapimiz bor. Hozircha to‘ylar to‘xtab turibdi, hali to‘y to‘yga ulanadigan oylar oldinda. Tadbir, gap-gashtak, choyxonama-choyxona yurishdan boshqa ishi qolmagandek hammaning. Go‘yoki yashash degani – hayoting tadbirlar, ma’rakalar, mehmondorchilik atrofida aylanishi demak. «Topganimiz to‘ylarga buyursin», degan niyat aslida yaxshi ma’nodagi «qarg‘ishdek» nafaqat «naqd»imizni balki vaqtimizni tadbirma tadbir, to‘yma to‘y yurishga sarflab yuborayotgandekmiz. Birinchi eshitganimda, ko‘pchilikning bir vaqtning o‘zida bayram, tadbir, gap-gashtak qilishidan xursand bo‘ldim. Ammo keyin o‘ylab qoldim: bu an’ana haqiqatdan ham samimiy mehmondo‘stlikmi yoki «dasturxon dabdabasi kulti» degan yangi madaniyatning bir qismiga aylanib ulgurdimi? («Kult» – ma’lum bir odat, an’ana yoki urf-odatning haddan tashqari ideallashtirilishi, hatto maqsadga aylanishi.) Bizning mehmondo‘stligimiz tarixiy qadriyat, lekin bu qadriyat hozir qanday shakl oldi? Ilgari gashtaklar va iftorlar tor doirada o‘tar edi, hozir esa ular ommaviylashdi. Ko‘pchilik uchun bunday tadbirlar ijtimoiy maqom ko‘rsatish vositasiga aylanyapti. «Qaysi restoranda iftor o‘tkazding?», «Falon odam uchun iftorlik qildim», «Bugun choyxonam bor», «shu oy uchta «gap»im bor», ijtimoiy tarmoqlarga kirsang ham: «falon joyda «pati», ya’ni bazmda mazza qildim», degan fikrlar... Haqiqiy mehmondo‘stlikmi yoki ko‘z-ko‘zlash Bu mehmonnovozliklarning bir uchi ijtimoiy bosimga borib taqaladi. Ya’ni bunday ziyofatlar «hashamga qarab odam qadrlanadi» degan tushunchani kuchaytirib yubormayaptimi? Kimning dasturxoni to‘kin, kimning taomlari xil-xil – shu narsalar inson qadrini belgilaydimi? Ochig‘i, bu qadimdan mehmondo‘stlikka katta e’tibor bergan jamiyatimiz uchun jiddiy savol. Nazarimda oddiylik, samimiylik o‘rniga hashamat va isrof madaniyati kuchayayotgandek. Masalan, iftor – ibodat uchun ajratilgan vaqt, ruhiy poklanish davri. Ammo u shunchaki katta yig‘ilish va hashamatli ovqatlanish tadbiriga aylansa, ma’naviyat nuqtayi nazaridan qanchalik ahamiyatli? Bir qaraganda, bu yig‘inlar yaxshi – odamlar bir-biri bilan ko‘rishadi, muloqot qiladi, uyda o‘tirib qolmaydi. Ammo bu an’ana ayrim hollarda formal majburiyatga aylanib borayotgani ko‘zga tashlanadi. To‘yga borsangiz, kamida uch soat o‘tirishingiz shart. Qolmasangiz, «hurmat qilmadi» degan gap chiqadi. Tadbirlarda ovqat masalasi Ilgari yig‘inlarda taomlarning xili sanoqli edi. Hozir esa ovqatning turi ko‘paymoqda. Saxovat va isrof o‘rtasidagi farqni yo‘qotib qo‘ydik. Katta dasturxon yozish va ko‘p odamni chaqirishni saxovat deb o‘ylaymiz, ammo haqiqiy saxovat muhtojlarga yordam berish emasmi? Qolaversa oila budjetiga og‘irlikni aytmaysizmi. Har bir gashtak, tug‘ilgan kun, choyxona – bu katta xarajat. Agar bunday tadbirlar haddan tashqari ko‘paysa, inson o‘z moliyaviy barqarorligiga zarar yetkazishi mumkin. Buning ortidan balki kimlardir dam olar, ammo kimlargadir stress va charchoq keltirib chiqarishimizni o‘ylab ham ko‘rmaymiz. Ayniqsa katta tadbirlar ko‘pincha uy bekalari uchun og‘ir yukka aylanadi. Har doim mehmon kutish, katta dasturxon yozish va ideal ko‘rinishga intilish orqali charchoq va asabiylik kuchayadi. Tabiiylik o‘rniga sun’iylik Avvalari kamtar dasturxon va samimiylik eng muhimi edi. Hozir esa hashamkorlik, restoranlarda qilinadigan tantanalar va sun’iy bezaklar muhim bo‘lib qoldi. Odatiy va bir xil ssenariylar-chi? Barcha tadbirlar bir-birini takrorlayapti: bezaklar ham, ovqatlar ham, hatto so‘zlashiladigan gaplar ham. Umuman bu tadbirlarda qanaqa samimiy suhbat bo‘lishi mumkin. Hamma boshini dasturxondan ko‘tarmasa, odamlar bir-birini eshitish uchun sharoit bo‘lmasa, shovqin-suron va qoshiq, kosalarning taraqlashi, qolaversa vaqt masalasi. Parhezning foydasi yo‘q Ziyofatlar odamlarni birlashtirishi bilan birga, ularga ortiqcha vazn ham qo‘shishi mumkin. Ko‘pchilik to‘y yoki gap-gashtakka borganda «Yoqmasa, yeyish shart emas» deb o‘ylamaydi, chunki bu mehmondorchilik madaniyatiga to‘g‘ri kelmaydi. Hech kim «mazam yo‘q» yoki «parhezdaman» deyishga jur’at qilmaydi. Qolaversa, ayrim tadbirlarda yog‘li va shirin taomlar shu qadar ko‘p bo‘ladiki, hatto parhez qilmoqchi bo‘lgan odam ham o‘zini tiya olmaydi. Bundan tashqari, tadbirlarda ko‘p o‘tirish, kam harakat qilish ham semizlikka olib keladi. Mehmon bo‘lib borgan joyda aylanib yurish, sal yugurish yoki mashq qilish mumkin emas-da. Ijtimoiy tarmoqlarga ko‘chgan ma’rakalar Avvallari odamlar birovning uyiga mehmonga borayotganini aytib qo‘yishning imkoni bo‘lmagan. Shu bois mehmondorchilik kam bo‘lgan. Ilgari to‘ylar, yubileylar, turli yig‘ilishlar faqat oila va mahallaning ichida muhokama qilinardi hozir ijtimoiy tarmoqlar orqali ular keng yoyilmoqda. Bugungi kunda kimdir biror tadbir o‘tkazmasa, u «kamchilik»dek qabul qilinadi. Aksincha, o‘z tadbiri yoki bayrami haqida ijtimoiy tarmoqlarda gapirmagan odam «unchalik ham muhim emas»dek ko‘rilishi mumkin. Shu sababli ko‘plab odamlar nafaqat o‘zlari xohlagani uchun, balki ijtimoiy tarmoqlarda ko‘rinish berish uchun ham tadbirlar uyushtirishga harakat qiladi. Qovun-qovundan rang olibdi degandek, guruh-guruh bo‘lib yig‘ilishlar shu ijtimoiy tarmoqlar orqali amalga oshirilmoqda. Qarindosh urug‘lardan ortib ijtimoiy tarmoq ya’ni virtual do‘stlarga ham vaqt topayapmiz. Topmasa, bormasa bo‘lmasa... Gap-gashtak, choyxona, to‘y, bazmlar, tug‘ilgan kun, bayramlar va ularni o‘tkazishga sabablar haddan ortiq ko‘payib ketmayaptimi? Qachon mundoq yashash uchun vaqt topamiz yoki yashamoq degani shumi?

Prezident yordamchisi Saida Mirziyoyeva AQSH Kongressi a’zosi, O‘zbekiston bilan hamkorlik bo‘yicha parlament kokusi ishtirokchisi Kerol Miller bilan uchrashuv o‘tkazdi. Bu haqda u o‘zining Telegram'dagi kanalida yozib qoldirdi. Qayd etilishicha, uchrashuvda O‘zbekiston—AQSH munosabatlarini yanada mustahkamlash yuzasidan fikr almashilgan. «Ta’lim sohasidagi islohotlar, xotin-qizlarning huquq va imkoniyatlarini kengaytirish, bu yo‘nalishlarda Kongress bilan hamkorlikni kuchaytirish masalalariga to‘xtaldik. Qizg‘in suhbat va qo‘llab-quvvatlov uchun Miller xonimga minnatdorlik bildiraman», — deb yozadi Saida Mirziyoyeva. Eslatib o‘tamiz, Shavkat Mirziyoyev 17 mart kuni Kerol Miller boshchiligidagi delegatsiyani qabul qilgandi. Uchrashuv davomida iqtisodiy va investitsiyaviy loyihalarni, shu jumladan, tog‘-kon, sanoat, energetika, qishloq xo‘jaligi sohalaridagi loyihalarni qo‘llab-quvvatlash va ilgari surish maqsadida parlamentlararo hamkorlikni kengaytirishga alohida e’tibor qaratilgan.

9 qavatli bino qurilish jarayoni Foto: Kun.uz Toshkentda bir necha yildan beri hunarmandlar va “Turon meros” MCHJ o‘rtasida bahsli vaziyat davom etib kelayotgandi. Nizoli vaziyat Uchtepa tumanida Hunarmandlar markazi qurilishi bilan bog‘liq. Gap shundaki, Suzukota majmuasi qurilishi munosabati bilan hunarmandlarga tegishli ustaxonalar buzilgach, 2019 yil 26 maydagi hukumat sayyor yig‘ilishi bayoni bilan Uchtepa tumani Foziltepa ko‘chasida joylashgan 2,7 gektar yer maydonida “Hunarmandlar guzari” markazi qurilishi hamda hunarmandlarning buzilgan mulklariga kompensatsiya sifatida quriladigan binoning birinchi qavatidan 52 nafar hunarmand uchun jami maydoni 12 ming 204 metr kvadrat bo‘lgan xonalar ajratib berilishi belgilangandi. Biroq Uchtepa tumanida barpo etilishi kerak bo‘lgan 4 qavatli hunarmandlar maskani qurilishi boshlangach, “bir yumalab” ko‘p qavatli turar joyga aylanib qolgan. Ya’ni hujjatlarda ushbu hududda 4 qavatli bino qurilishi va unda hunarmandlar faoliyat ko‘rsatishi uchun barcha sharoitlar yaratilishi ko‘zda tutilgan bo‘lsa-da, Hunarmandlar markazi uchun ajratilgan joyda investor tomonidan 9 qavatli uy qurila boshlangan. Fuqarolik ishlari bo‘yicha Uchtepa tumanlararo sudining 2024 yil 25 oktyabrdagi qarori bilan Toshkent shahar qurilish sohasida nazorat inspeksiyasining “Turon meros” MCHJga nisbatan noqonuniy qurilgan qurilmani buzish haqidagi da’vosi qanoatlantirilgan. Sud hujjatiga ko‘ra, Uchtepa tumani, 178-uy manzilida joylashgan 9 qavatli binoni “Turon meros” MCHJ hisobidan buzib tashlash belgilangan. Toshkent shahar sudi fuqarolik ishlari bo‘yicha sudlov hay’ati apellyatsiya instansiyasining 2025 yil 5 fevraldagi ajrimi bilan dastlabki sud qarori o‘zgarishsiz qoldirilgan. Hozirda ish taftish instansiyasida ko‘rib chiqilmoqda.

Majburiy ijro byurosi Andijon viloyati boshqarmasi, shahar-tuman bo‘limlari tomonidan voyaga yetmaganlarning huquq va manfaatlarini himoya qilish borasida bir qator ijobiy ishlar amalga oshirilmoqda. Xususan, aliment to‘lovchi otalardan farzandlari uchun moddiy ta’minot undirish bilan bir qatorda ularni ish bilan bandligini ta’minlashga ham ko‘maklashib kelinmoqda. Shunday tadbirlardan biri joriy yilning 19 mart kuni Andijon shahrida tashkil qilinib, unda sud tomonidan aliment to‘lash majburiyati yuklatilgan ishsiz shaxslar uchun “Mehnat yarmarkasi” o‘tkazildi. Ushbu yarmarka farzand uchun to‘lanishi belgilangan aliment to‘lovlarini to‘lashda qiyinchilikka duch kelayotgan ishsiz otalarni ish bilan ta’minlashni maqsad qilgani holda boshqa ishsiz fuqarolar uchun ham xizmat ko‘rsatdi. Tadbirga tashrif buyurgan fuqarolar jami 30 ta korxona, tashkilot va boshqa davlat muassasalari tomonidan ko‘rsatilayotgan 250 dan ziyod bo‘sh ish o‘rinlari bilan tanishish imkoniyatiga ega bo‘ldi. O‘tkazilgan bo‘sh ish o‘rinlari mehnat yarmarkasida 42 nafar aliment to‘lovchilar shu kunning o‘zida doimiy ish joyiga ega bo‘lgan bo‘lsalar, 15 nafariga yo‘llanma berildi, qolganlari esa Aholi bandligiga ko‘maklashish bo‘limi tomonidan ishsiz sifatida ro‘yxatga olinishiga ko‘maklashildi.

Ma’lumki, hayotda jinoiy qilmishlarni sodir etilishiga odatda, kimningdir nafs qutqusiga uchishi, qonun talablariga bepisand munosabati va o‘zgalar huquqini hurmat qilmaslik kabi illatlar sabab bo‘ladi. Kuz-qish mavsumi insonlar uchun issiqlik, qulaylik va oilaviy muhitni ta’minlash vaqtidir. Bunday paytlarda ko‘mirga bo‘lgan talab ortib, ko‘pchilik odamlar o‘z xonadonlarini isitish uchun uni sotib olishadi. Ammo, bu faoliyatdan foyda olishni maqsad qilgan Xaydar va Xamidning jinoiy sxemalari haqiqatda faqatgina moliyaviy manfaatlarni ko‘zlashdan iborat edi. Xaydar ko‘mir ombori mudiri sifatida aholiga imtiyozli narxlarda ko‘mir yetkazib berish vazifasini bajarishi kerak edi. Biroq u bu vazifasini suiiste’mol qilishga kirishib, yordamchisi Xamid bilan birlashib jinoiy “ko‘mir” biznesini boshladi. Lekin ota-bobolarimiz aytganidek: "Qing‘ir ishning qiyig‘i qirq yilda ham bilinadi". Ularning biznesi uzoqqa cho‘zilmadi. Jinoyat ishlari bo‘yicha Rishton tuman sudining qaroriga asosan, Xaydardan jinoiy jarima to‘lash bo‘yicha ijro hujjati Byuroning Marg‘ilon shahar bo‘limi ish yurituviga kelib tushdi. Davlat ijrochisining majburiy ijro harakatlari natijasida “ko‘mirchi” biznesmendan 51 mln so‘m jinoiy jarima undirildi.

Abduqodir Husanov kecha o‘zining yaqinlariga hamda turli mehmonlarga ajoyib romantik va e’tiborli syurpriz bilan quvonchli daqiqalar taqdim etdi. U o‘zining bo‘lajak rafiqasiga "Marry Me" (Menga turmushga chiqasizmi?) deb so‘rab, uni juda o‘zgacha va esda qolarli vaqtni o‘tkazish uchun tashrif buyurgan. O‘tkazilgan marosimning joyi va chiroyli interer, san’atkorlar ijrosida jonli musiqa, shodlik va muhim so‘zlar bilan boyitilgan mavzu, unga romantik jozibani yanada mustahkamladi. O‘zining mustaqillik va ishtiyoqini namoyon etish maqsadida, Abduqodir bunga alohida tarzda ahamiyat berishni istagani ko‘rinib turibdi. O‘tkazilgan marosim, shu kabi va shunday muhitdagi har bir holat har doim dildan o‘tgan buyuk qarorlar uchun yaxshi yodgorliklar taqdim etadi.

Endi aliment to‘lovchi otaning farzandi ham boshqa bolalar qatori Navro‘z bayramini ko‘tarinki ruxda nishonlaydi. Fuqarolik ishlari Urgut tuman sudining ijro hujjatiga asosan qarzdor J.T.dan undiruvchi G.Ye.ning foydasiga bir nafar farzandining ta’minoti uchun aliment undirish belgilangan. Mazkur sud qaroriga asosan ijro hujjati bo‘yicha Byuroning Urgut tuman bo‘limi tomonidan ijro ishi yuritilgan. Ijro hujjati ijrosini ta’minlash mobaynida olib borilgan tushuntirishlar o‘z samarasini berdi. Qarzdor ota Navro‘z bayrami arafasida farzandiga aliment uchun hisoblangan 80 million so‘mni bir yo‘la oldindan to‘lab berdi. Bu boradagi ishlar davom etmoqda.

Avvalroq Angrenda yuz bergan yirik yo‘l-transport hodisasi haqida xabar berilgandi. Bu haqida Upl.uz xabar berdi. Toshkent–Osh xalqaro avtomobil yo‘lida bir nechta transport vositalari ishtirokida avtohalokat sodir bo‘ldi. Hodisa 7-sentyabr kuni soat taxminan 12:20 da yuz berdi. Ichki ishlar organlaridan olingan ma’lumotlarga ko‘ra, Shacman rusumli yuk mashinasi, unda sement tashilayotgan va 44 yoshli haydovchi boshqaruvida bo‘lgan, boshqaruvni yo‘qotib, temiryo‘l o‘tish joyida to‘xtab turgan ikkita yuk mashinasi va beshta yengil avtomobilga urildi. Zarba natijasida yong‘in yuzaga keldi, ammo voqea joyiga yetib kelgan tezkor xizmatlar tomonidan tezda o‘chirilgan. Ichki ishlar organlari o‘lim va jarohat olganlar soni haqida ma’lumot berdi. Hodisa joyida yetti kishi halok bo‘ldi. Besh kishi shifoxonaga yotqizildi, yana to‘rt nafar ishtirokchi tibbiy yordam olib, uyiga yuborildi. Hozirgi vaqtda hukumat hodisaning sabablarini o‘rganish uchun komissiya tuzdi. Komissiyaga boshchilik qilish uchun Bosh vazir o‘rinbosari Achilbay Ramatov tayinlandi.

Ispaniyada yosh futbolchilar o‘rtasida xalqaro futbol turniri bo‘lib o‘tmoqda. Bu haqida Upl.uz xabar berdi. O‘zbekistonning 17 yoshgacha bo‘lgan terma jamoasi turnirning ikkinchi bosqichida Kanada terma jamoasi bilan bellashdi. Asosiy vaqt davomida o‘yin 2:2 hisobida yakunlandi. Penaltilar seriyasida O‘zbekiston jamoasi 6:5 hisobida g‘alaba qozondi. Birinchi bosqichda O‘zbekiston terma jamoasi Angliya jamoasiga 3:1 hisobida mag‘lub bo‘lgan edi. Terma jamoa xalqaro musobaqalarda ishtirok etishni davom ettirib, tajriba orttirishga harakat qilmoqda. Bu kabi musobaqalar yosh futbolchilar uchun muhim bo‘lib, ularning mahoratini oshirishga xizmat qiladi. O‘zbekiston futboli kelajakda yanada rivojlanishi uchun yoshlar o‘rtasidagi bunday turnirlar katta ahamiyatga ega. Terma jamoaning keyingi o‘yinlari ham qiziqish bilan kuzatilmoqda.

2023 yil 7 sentyabr kuni soat 12:20 atrofida xalqaro A-373 «Toshkent-Osh» avtomobil yo‘lida jiddiy yo‘l-transport hodisasi yuz berdi. Bu haqida Upl.uz xabar berdi. Hodisada bir nechta avtomobillar ishtirok etgan. Bu haqda UPL muxbiri xabar berdi. Toshkent viloyati Ichki ishlar boshqarmasi hodisa yuzasidan O‘zbekiston Respublikasi Jinoyat kodeksining 266-moddasi 3-qismi bo‘yicha jinoiy ish qo‘zg‘atilganini ma’lum qildi. Hozirda tergov harakatlari olib borilmoqda. Rasmiy ma’lumotlarda halok bo‘lganlar va jarohat olganlar soni haqida aniq ma’lumot berilmagan. Norasmiy manbalarga ko‘ra, qurbonlar soni 10 nafarga yetishi mumkin. Ijtimoiy tarmoqlarda ushbu yo‘l-transport hodisasi joyidan olingan videolar tarqaldi. Videolarda bir nechta avtomobillar ishtirokidagi avariya hamda uning oqibatida yuzaga kelgan yong‘in tasvirlangan. Hodisa joyida tezkor xizmatlar faoliyat olib bormoqda. Tergov jarayonlari davom etmoqda. Yo‘l harakati xavfsizligi qoidalariga qat’iy rioya qilish muhimligi yana bir bor ta’kidlanmoqda.

O‘zbekistonda umumiy o‘rta ta’lim tizimi tubdan o‘zgarishlarga yuz tutmoqda. Bu haqida Upl.uz xabar berdi. Mamlakatda rasmiy ravishda 12 yillik ta’lim modeli joriy etilishi boshlandi. Bu haqda Maktabgacha va maktab ta’limi vazirligi matbuot xizmatidan ma’lum qilindi. Yaqin kunlarda ushbu yangiliklarni tasdiqlovchi normativ-huquqiy hujjat imzolanishi kutilmoqda. Ushbu qaror ta’lim sohasini isloh qilish bo‘yicha keng qamrovli dastur doirasida qabul qilindi. Dastur prezidentga 8 sentyabr kuni taqdim etilgan bo‘lib, u maktabgacha ta’limdan tortib oliy ta’limgacha bo‘lgan barcha bosqichlarni tizimli yangilashni ko‘zda tutadi. 12 yillik ta’limga o‘tish xalqaro tajribaga moslashish maqsadida amalga oshirilmoqda. 2022 yilda o‘tkazilgan PISA tadqiqot natijalari shuni ko‘rsatdiki, ta’limda yetakchi hisoblangan 85 foiz mamlakatlarda o‘quv yillari soni aynan 12 yilni tashkil etadi. Yangi model joriy etilishi o‘quv dasturlarini xalqaro standartlarga moslashtirishga, shuningdek, o‘quvchilarni keyingi bilim olish va kasbga tayyorlash bosqichlariga sifatli tayyorlashga imkon beradi. Yangilangan tizim tuzilmasi quyidagicha bo‘ladi: birinchi yil 6 yoshdagi bolalar uchun maktabga tayyorgarlik bosqichi sifatida belgilangan bo‘lib, u boshlang‘ich ta’limning bir qismi hisoblanadi. Boshlang‘ich ta’lim umumiy 5 yilni tashkil etadi, bunda 1 yil tayyorgarlik va 4 yil boshlang‘ich maktab o‘quvi mavjud. Keyingi bosqich 5-9-sinflarni o‘z ichiga olgan asosiy umumiy o‘rta ta’lim bo‘lib, 5 yil davom etadi. So‘nggi 2 yil esa to‘liq umumiy o‘rta ta’lim bosqichi bo‘lib, u maktablar, akademik litseylar, ixtisoslashtirilgan harbiy maktablar yoki texnikumlarda olib boriladi. O‘tish jarayonini silliq tashkil etish va zarur infratuzilmani yaratish maqsadida 3600 ga yaqin yangi maktablar qurilishi va mingdan ortiq davlat bog‘chalari ochilishi rejalashtirilgan. Aynan shu muassasalarda eng kichik o‘quvchilar uchun yangilangan tayyorgarlik dasturi sinovdan o‘tkaziladi. Qiziqarli jihati shundaki, 12 yillik ta’limga o‘tish haqida ma’lumotlar 2023 yildan boshlab ijtimoiy tarmoqlarda faol muhokama qilinar edi. Ammo o‘sha paytda Maktabgacha va maktab ta’limi vazirligi bu gaplarni rasman rad etgan, amalda 11 yillik ta’lim amal qilganini ta’kidlagan. Hozirgi qaror davlat darajasida yondashuvlar qayta ko‘rib chiqilganini va keng ko‘lamli islohotlarni amalga oshirishga siyosiy iroda borligini ko‘rsatadi. Mustaqil O‘zbekiston tarixida ilgari ham 12 yillik ta’lim tizimi mavjud bo‘lgan. 2010 yildan 2017 yilgacha ta’lim 9+3 sxemasi asosida tashkil etilgan bo‘lib, unda 9-sinfni tamomlagan o‘quvchilar majburiy ravishda kasb-hunar kollejlari va akademik litseylarida ta’lim olishgan.

Ijtimoiy tarmoqlarda ayrim qurilish tashkilotlari fuqarolarni ularning roziligisiz xodim sifatida ro‘yxatga olish orqali o‘z reytinglarini oshirayotgani haqida ma’lumot tarqaldi. Bu haqida Upl.uz xabar berdi. Ushbu holatga O‘zbekiston Respublikasi Qurilish vazirligi matbuot xizmati munosabat bildirdi. Xabarda qayd etilishicha, qurilish va loyiha tashkilotlarining reytingi avtomatik tarzda hisoblanadi. Bu jarayon O‘zbekiston Respublikasi Vazirlar Mahkamasining 2020 yil 9 noyabrdagi 699-sonli qaroriga muvofiq, taxminan 10 ta vazirlik va idoralardan olingan ma’lumotlarga asoslanadi. Xususan, tashkilot xodimlari va ularga to‘lanadigan oylik maoshi, eng kam ish haqidan kam bo‘lmasligi sharti bilan (1 271 000 so‘m), kambag‘allikni qisqartirish va bandlik vazirligi hamda Soliq qo‘mitasi bazalaridan avtomatik tarzda olinadi. Shuning uchun milliy axborot tizimi “Shaffof qurilish” ushbu ma’lumotlarni o‘zgartirish yoki ularning haqiqiyligini aniqlash imkoniyatiga ega emas. Tizim faqat ma’lumotlarni yig‘adi va reyting.mc.uz platformasida foydalanuvchilarga ochiq tarzda taqdim etadi. Bugungi kunda Bandlik vazirligi bilan hamkorlikda qurilish sohasida shaxslarni roziligisiz xodim sifatida ro‘yxatga olish va bir vaqtning o‘zida bir nechta tashkilotda ishlash holatlarini tizimli tartibga solish bo‘yicha amaliy ishlar olib borilmoqda. Shu kabi holatlarning oldini olish maqsadida fuqarolardan shaxsiy ma’lumotlarini begonalarga bermaslik va qurilish tashkilotlariga roziligisiz ishga qabul qilingan taqdirda vakolatli organlarga murojaat qilishlari so‘ralmoqda.

Toshkent shahar Favqulodda vaziyatlar boshqarmasining matbuot xizmatidan olingan dastlabki ma’lumotlarga ko‘ra, Yakasaroy tumanida yong‘in sodir bo‘lgan. Bu haqida Upl.uz xabar berdi. 2024 yil 11 sentabr kuni soat taxminan 12:40 da Toshkent shahar Favqulodda vaziyatlar boshqarmasiga plastik quvurlar ishlab chiqarish sexida yong‘in haqida xabar kelib tushdi. Hodisa poytaxtning Yakasaroy tumanidagi Kushbegi ko‘chasida yuz berdi. Yong‘in joyiga yetib borish uchun olti daqiqa vaqt ketdi. Yong‘inni o‘chirishga yong‘in-qutqaruv bo‘linmalari darhol kirishdi. Soat 13:08 da olov mahalliylashtirildi, so‘ng yetti daqiqadan so‘ng to‘liq o‘chirilgan. Hodisa joyiga Favqulodda vaziyatlar vaziri hamda hududiy idoralar rahbarlari kelishdi. Hozirda yong‘inning sabablarini aniqlash maqsadida tergov guruhi ish olib bormoqda. Rasmiy ravishda hodisa yuzasidan boshqa ma’lumotlar berilmagan. Shuningdek, jabrlanganlar to‘g‘risida ham xabar yo‘q. Favqulodda vaziyatlar boshqarmasi keyinchalik hodisa haqida to‘liq ma’lumot taqdim etishini bildirgan.

O‘zbekiston poytaxtida og‘ir jinoyat sodir bo‘ldi. Bu haqida Upl.uz xabar berdi. Millar telekanali tomonidan berilgan ma’lumotga ko‘ra, 2022 yilda o‘z qizini ayiq zo‘riqishiga tashlab ketgan ayol uch yil o‘tib, qizini o‘ldirgan. Jinoyat hodisasi Toshkent shahrining Sergeli tumanida yuz berdi. Ma’lum bo‘lishicha, ayol ayiq bilan bog‘liq voqeadan so‘ng aqli sog‘lom emas deb topilgan va unga majburiy psixonevrologik muassasada davolanish belgilangan edi. 2023 yil 2 avgustda u ambulator davolanishga o‘tkazilgan. Qizga voqea yuz berganidan so‘ng tibbiy yordam ko‘rsatilgan va u bobosi hamda buvisining parvarishiga berilgan. Sentabr oyining boshida bola ikkinchi sinfga qadam qo‘ygan. Lekin o‘quv yilining boshlanishidan bir hafta o‘tib, ayol qizini oshxona pichog‘i bilan o‘ldirgan. Hozirda gumonlanuvchi ushlangan va unga nisbatan qasddan qotillik bo‘yicha jinoyat ishi qo‘zg‘atilgan.

7 sentyabr kuni Angrenda yuz bergan dahshatli avariyada halok bo‘lganlar soni 11 nafarga yetdi. Bu haqida Upl.uz xabar berdi. Dastlab 7 kishi halok bo‘lgani haqida xabar berilgan edi, biroq Farg‘ona viloyati hokimiyatining yangilangan ma’lumotlariga ko‘ra, avariyada yana 4 kishi vafot etdi. Avariya Shacman yuk avtomobili haydovchisi temiryo‘l o‘tish joyida boshqaruvni yo‘qotishi natijasida sodir bo‘ldi. Boshqaruvdan chiqqan yuk mashinasi yo‘lida turgan ikki yuk mashinasi va beshta yengil avtomobil bilan to‘qnashdi. Hodisa vaqtida halok bo‘lganlardan tashqari, besh kishi turli darajadagi tan jarohatlari bilan shifoxonaga yotqizildi, yana to‘rt kishiga esa joyida tibbiy yordam ko‘rsatildi. Farg‘ona viloyati hokimi halok bo‘lganlar va jabrlanganlar oilalariga tibbiy, moddiy hamda psixologik yordam ko‘rsatishni, shuningdek, dafn marosimlarini tashkil etishni topshirdi. Kelajakda shunday fojialarning oldini olish maqsadida transport infratuzilmasi auditi o‘tkazilishi belgilandi. Avariyaning sabablarini o‘rganish va yuk tashish qoidalarini takomillashtirish uchun xorijiy ilg‘or tajriba tahlil qilinadi.