“Miss Jahon – 2025” g‘olibasi taylandlik go‘zal bo‘ldi
“Miss Jahon – 2025” tanlovining final bosqichi Hindistonning Haydarobod shahrida bo‘lib o‘tdi, deb xabar berdi Nova24.uz. Unda 108 nafar qiz ishtirok etdi. Yakunda Tayland vakili Opal Suchata Chuangsri g‘olib deb topildi.
21 yoshli Bangkoklik go‘zal xalqaro munosabatlar yo‘nalishida o‘qimoqda va siyosat hamda xalqaro aloqalar bo‘yicha bakalavr darajasini olmoqda. U Pxuketda mehmonxona biznesini boshqaradi va tay, ingliz, ispan va xitoy tillarini biladi.
Opal shuningdek, inson huquqlarini himoya qilish faoliyati bilan ham shug‘ullanadi. 16 yoshida ko‘krak bezidagi xavfsiz o‘simtani olib tashlash operatsiyasini boshdan kechirgan. Shu tajriba uni Opal For Her nomli loyihani ishga tushirishga ilhomlantirgan. Loyiha ayollar sog‘lig‘i va erta diagnostika haqida xabardorlikni oshirishga qaratilgan.
U go‘zallik sohasidagi faoliyatini 2012 yilda “Miss Rattanakosin” tanlovida boshlagan, ammo sovrindor bo‘lmagan. 2022 va 2024 yillarda “Miss Universe Thailand” tanlovida ishtirok etib, bir nechta maxsus mukofotlar — “Miss Charming Talent”, “Miss Beauty and Confidence” hamda asosiy sovrinni qo‘lga kiritgan.
2024 yilgi “Miss Universe” xalqaro tanlovida uchinchi o‘rinni egallagan, ammo 2025 yilda “Miss Jahon”da g‘oliblikni qo‘lga kiritdi.
Ikkinchi o‘rin — Efiopiya vakili Hasset Dreej Admassu, uchinchi o‘rin esa Polsha vakili Maya Klaydaga nasib etdi.
