Piskentdagi test poligonida avtomobillarni texnik ko‘rikdan o‘tkazish uchun navbat olish bilan bog‘liq muammolar yana avj oldi, deb xabar bermoqda Nova24.uz. Holat yuzasidan Davlat ilmiy sinov va sifat nazorati markazi izoh berdi.
20–25 mart kunlari elektron navbat tizimiga bir xil IP-manzillardan juda ko‘p so‘rovlar yuborilgan. Bu esa tizimning ortiqcha yuklanishiga va firibgarlar tomonidan navbat sotilishi holatlariga olib kelgan. Ayrim fuqarolar ijtimoiy tarmoqlarda navbatdan tashqari o‘tish uchun 10 million so‘mgacha pul so‘ralayotganini bildirgan.
Biroq mutasaddilar bu xabarlarni rad etdi. Ularning aytishicha, bunday pul to‘lovi mavjud emas. Hozirda benzin va gibrid avtomobillar uchun sertifikatlash narxi 5,6 million so‘m, elektroavtomobillar uchun esa 4,48 million so‘mni tashkil etadi.
UzTest mutaxassislari tizim xavfsizligini kuchaytirish ustida ishlamoqda. Shuningdek, firibgarlikka duch kelgan fuqarolar 1880 qisqa raqamiga murojaat qilishlari so‘raldi.
Eslatib o‘tamiz, ilgari Antikorrupsiya agentligi ham Piskentdagi navbatlar bilan qiziqqan edi. Chunki ayrim avtomobil importchilari sertifikat olish jarayoni butun kunni olishini bildirgan edi.
