Boysun tog‘larida 9200 yillik dehqonchilik topildi
Surxondaryo viloyatidagi Boysun tog‘lari hududida yangi arxeologik kashfiyot amalga oshirildi. Bu haqda Zamin.uz xabar berdi.
To‘da g‘orida olib borilgan qazishmalar natijasida taxminan 9200 yil oldingi davrga oid qadimiy mehnat qurollari va yovvoyi donli o‘simliklar qoldiqlari topildi. Madaniy meros agentligining ma’lumotlariga ko‘ra, bu topilmalar mintaqaning ilk aholisi ovchilik, terimchilik bilan birga dehqonchilikning dastlabki shakllari bilan shug‘ullanganini ko‘rsatadi.
Tadqiqotlar Xitoy Fanlar akademiyasi Qazilmalar va paleoantropologiya instituti professori Xinying Chjou boshchiligida, shuningdek, Samarqand arxeologiya instituti olimlari ishtirokida olib borildi. Qazishmalar davomida qadimiy tosh o‘roqlar, yovvoyi don urug‘lari va ularni qayta ishlash uchun mo‘ljallangan asboblar topildi.
Ushbu asboblarning yuzasida g‘alla poyalarini o‘rish va qayta ishlash belgilari aniq saqlangan. Germaniyadagi Geoantropologiya instituti olimlaridan biri Robert Shpenglerning ta’kidlashicha, bu kashfiyot dehqonchilikning faqat bitta hududda emas, balki Yevroosiyo mintaqasining turli joylarida mustaqil ravishda shakllanganini tasdiqlaydi.
Shuningdek, shunga o‘xshash qurollar Levant hududi va Qirg‘izistondagi Obishir-5 manzilgohida ham aniqlangan. Bu esa agrar an’analar turli hududlarda o‘z-o‘zidan paydo bo‘lganidan dalolat beradi.
Mutaxassislar fikricha, Boysun tog‘larida topilgan arxeologik topilmalar nafaqat O‘zbekiston tarixini chuqur o‘rganishda, balki insoniyatning ilk agrar madaniyati qanday vujudga kelganini tushunishda ham katta ahamiyatga ega. Ushbu kashfiyot jahon arxeologiyasida muhim manba sifatida e’tirof etilmoqda (manba: zamin.uz).
