Turinning "Yuventus" klubi joriy transfer oynasida hujumchi Dushan Vlahovich bilan xayrlashishni rejalashtirmoqda. Bu haqida Euro-football.ru xabar berdi.
"Yuventus" Madridning "Atletiko" klubidan o‘ng qanot himoyachisi Nauel Molinani sotib olish ustida ish olib bormoqda. Serb futbolchining ushbu bitim tarkibida ishtirok etishi mumkinligi haqida Gazzetta dello Sport nashri xabar bermoqda.
Molinaning narxi taxminan 30 million yevroga baholanmoqda, shuning uchun "Yuventus"ga "Atletiko"ga qo‘shimcha to‘lov qilishga to‘g‘ri kelishi mumkin. Dushan Vlahovichni o‘z safiga qo‘shmoqchi bo‘lgan jamoalar uchun asosiy muammo uning maosh talablari hisoblanadi.
25 yoshli hujumchining "Yuventus" bilan amaldagi shartnomasi keyingi yil o‘rtalarida yakunlanadi. Shuningdek, "Milan" klubi ham serb futbolchisiga qiziqish bildirgan jamoalar qatoriga kiradi.
"Yuventus" bundan keyingi transfer siyosatini ham hisobga olgan holda, jamoa tarkibini kuchaytirish va moliyaviy barqarorlikni ta’minlash ustida ishlamoqda.
👍 0❤️ 0😂 0😢 0😡 0
