Sobiq “Barselona” himoyachisi Tomas Vermalen jamoaning hozirgi darajasi haqida o‘z fikrlari bilan o‘rtoqlashdi. Bu haqida Euro-football.ru xabar berdi.
Vermalenning aytishicha, “Barselona” o‘tgan mavsumni juda yaxshi o‘tkazdi. Klub La Liga, Ispaniya Kubogi va mamlakat Superkubogini qo‘lga kiritdi.
Chempionlar ligasida esa Xans Diter Flik boshchiligidagi jamoa yarim final bosqichiga chiqdi, biroq “Inter” klubiga imkoniyatni boy berdi. Vermalen o‘z intervyusida, Yevropa futbolini doimiy kuzatib borishini ta’kidladi.
Uning so‘zlariga ko‘ra, “Barselona” ayniqsa Chempionlar ligasida o‘zini yaxshi ko‘rsatdi. Klub tarkibidagi yosh futbolchilar o‘z iste’dodi bilan ajralib turadi va ularning o‘sishini kuzatish qiziqarli ekanini aytdi.
Tomas Vermalen 2022 yilda futbolchilik faoliyatini yakunlagan. U “Barselona” safida 2014 yildan 2019 yilgacha harakat qilgan.
Sobiq futbolchi Kataloniya klubi bilan o‘z faoliyatining muhim qismini o‘tkazgan.
