Estevao: Chelsiga o‘tish men uchun katta sharaf
18 yoshli braziliyalik hujumkor yarim himoyachi Estevao Vilyan «Chelsi» klubiga qo‘shildi. Bu haqida Euro-football.ru xabar berdi.
Uning yozda London jamoasiga Braziliyaning «Palmeyras» klubidan o‘tishi haqida o‘tgan yilning iyun oyida rasmiy xabar berilgan edi. Estevao Angliyaga kelganidan so‘ng o‘z fikrlari bilan o‘rtoqlashdi.
Uning aytishicha, «Chelsi» kabi dunyoning eng yirik klublaridan birida o‘ynash uning uchun katta sharaf hisoblanadi. Estevao o‘zini juda baxtli his qilayotganini, jamoaga qo‘lidan kelgancha yordam berishni istashini ta’kidladi.
U bu yerga kelish uchun deyarli bir yarim yil kutganini, shu vaqt davomida tinmay mehnat qilganini va o‘zini eng yaxshi sport formasida ushlab turishga harakat qilganini bildirdi. Estevao yangi tajriba va hayotining yangi bosqichini intiqlik bilan kutayotganini, bu imkoniyatdan unumli foydalanishga harakat qilishini qayd etdi.
Eslatib o‘tamiz, «Chelsi» yangi Angliya chempionatidagi ilk o‘yinini 17 avgust kuni «Kristal Pelas»ga qarshi o‘tkazadi.
