Rossiya milliy jamoasi sentabr oyida o‘tkaziladigan o‘rtoqlik uchrashuvlaridagi navbatdagi raqibini aniqladi. Bu haqida Euro-football.ru xabar berdi.
Mamlakat terma jamoasi matbuot xizmati bergan xabarga ko‘ra, Valeriy Karpin boshchiligidagi Rossiya terma jamoasi safarda Qatar terma jamoasiga qarshi maydonga tushadi. Ushbu uchrashuv 7 sentabr kuni bo‘lib o‘tadi.
Ma’lumot uchun, Qatar terma jamoasi hozirda FIFA reytingida 53-o‘rinda joylashgan. Qatar terma jamoasini hozirda mashhur ispan mutaxassisi Xulen Lopetegi boshqarib kelmoqda.
Avvalroq, sentabr oyida Rossiya terma jamoasi yana bir o‘rtoqlik uchrashuvini Iordaniya terma jamoasiga qarshi o‘tkazishi e’lon qilingan edi. Shuni ham ta’kidlash kerakki, FIFA va UEFA qaroriga ko‘ra, Rossiya terma jamoalari hamda klublari xalqaro musobaqalarda ishtirok etishdan chetlatilgan.
Shu bois, hozirgi paytda Rossiya terma jamoasi faqat o‘rtoqlik uchrashuvlarida qatnashmoqda. Bu o‘yinlar jamoa uchun xalqaro tajriba orttirish va sport formasi saqlab turish imkonini beradi.
