Rossiya terma jamoasi va Moskvaning Dinamo klubi sobiq hujumchisi Dmitriy Bulykin Rossiya Premer-ligasida chet ellik futbolchilarga qo‘yiladigan cheklov kuchayishi ehtimoli haqida o‘z fikrini bildirdi. Bu haqida Euro-football.ru xabar berdi.
Uning aytishicha, bu borada hamma ham rozilik bildirmaydi, biroq mavjud vaziyatda boshqa yo‘l yo‘q. Endi klublar asosan rossiyalik futbolchilarning o‘sishini diqqat bilan kuzatishi, o‘z futbol akademiyalariga e’tibor qaratishi kerak bo‘ladi.
Shu bilan birga, chet ellik futbolchilarni katta mablag‘ evaziga xarid qilish amaliyoti kamayishi mumkin. Avvalroq matbuotda 2026/2027-yilgi mavsumdan boshlab yangi cheklov joriy etilishi kutilayotgani haqida xabarlar paydo bo‘lgan edi.
Unga ko‘ra, maydonda bir vaqtning o‘zida besh nafar chet ellik futbolchi ishtirok etishi mumkin bo‘ladi. Hozirgi amaldagi qoidalarga muvofiq esa bir jamoa tarkibida bir vaqtda sakkiz nafar chet ellik futbolchi maydonga chiqishi mumkin.
Ushbu o‘zgarishlar milliy futbolchilarning rivojlanishiga va mahalliy yoshlarni qo‘llab-quvvatlashga xizmat qilishi kutilmoqda.
