Sankt-Peterburgning Zenit futbol klubi bosh murabbiyi Sergey Semak Grozniy shahri jamoasi Ahmatning yangi bosh murabbiyi Stanislav Cherchesov haqida o‘z fikrini bildirdi. Bu haqida Euro-football.ru xabar berdi.
Uning aytishicha, Cherchesov o‘zining bosh murabbiy sifatidagi tajribasi va kasbiy mahoratini nafaqat klublarda, balki Rossiya terma jamoasida ham isbotlagan. Semakning ta’kidlashicha, Cherchesovning murabbiylik salohiyatiga hech kim shubha qilmaydi.
Ma’lumot uchun, Zenit jamoasi Rossiya chempionati doirasidagi navbatdagi o‘yinini aynan Ahmat jamoasiga qarshi o‘tkazadi. Uchrashuv Grozniy shahrida, shanba kuni, 9-avgust sanasida bo‘lib o‘tishi rejalashtirilgan.
Shuni ham aytib o‘tish kerakki, o‘tgan hafta Zenit Ahmatga qarshi Fonbet Rossiya Kubogining guruh bosqichida mehmon sifatida maydonga tushdi va Aleksandr Storojuk boshchiligidagi mezbonlarni 2:1 hisobida mag‘lub etdi. Eslatib o‘tamiz, Stanislav Cherchesov 6-avgust, chorshanba kuni Ahmat jamoasining bosh murabbiyi etib rasman tayinlandi.
