UEFA Rossiya klublariga 10 million yevrodan ortiq to‘lagan
The Guardian nashrida Yevropa futbol assotsiatsiyalari ittifoqi, ya’ni UEFA tomonidan Rossiya klublariga sanksiyalar davrida to‘langan mablag‘lar haqida maqola chop etildi. Bu haqida Euro-football.ru xabar berdi.
Xalqaro rasmiy o‘yinlarda Rossiya jamoalarining ishtirok etishi taqiqlangan bo‘lishiga qaramay, UEFA hali ham ayrim dasturlar doirasida ularga pul o‘tkazmoqda. Bunday dasturlardan biri — birdamlik dasturi hisoblanadi.
Ushbu dastur, asosan, o‘z mamlakat chempionatlarida yuqori natijalarga erisha olmaydigan va xalqaro musobaqalarda qatnashish huquqiga ega bo‘lmagan klublarni qo‘llab-quvvatlash uchun tashkil etilgan. UEFA bu orqali Yevropa ligalarida raqobatbardoshlikni saqlab qolishni maqsad qilgan.
Ma’lum qilinishicha, sanksiyalar joriy etilgandan buyon Rossiya klublariga umumiy hisobda 10,8 million yevrodan ortiq mablag‘ to‘langan. Biroq, Ukraina hududida harbiy harakatlar davom etayotganligi sababli, beshta ukrain klubi mazkur dasturdan to‘liq foydalana olmagan va ularga mablag‘ ajratilmagan.
Shuningdek, UEFA bu mablag‘larni ajratishda har bir klubning holatini alohida ko‘rib chiqadi va tegishli tartibda qaror qabul qiladi.
