Isakning “Nyukasl”dagi kelajagi birinchi tur oldidan mavhum
“Nyukasl” bosh murabbiyi Eddi Xau yangi Angliya chempionati mavsumining birinchi uchrashuvida Aleksandr Isakga tayanishi mumkin yoki yo‘qligi haqida ma’lumot berdi. Bu haqida Euro-football.ru xabar berdi.
Shvetsiyalik hujumchi o‘zining “Liverpul” klubiga o‘tishini istamoqda va hozirgi jamoasi “Nyukasl” safida o‘ynashni xohlamayotgani aytilmoqda. 16-avgust kuni Xau jamoasi safarda “Aston Villa”ga qarshi Premer-liganing birinchi tur uchrashuvida maydonga tushadi.
Bosh murabbiy Eddi Xau o‘z bayonotida shunday dedi: “Men Isak bugun ‘Espanyol’ga qarshi o‘rtoqlik uchrashuvida o‘ynashini xohlagan edim. Ertaga ham biz bilan mashg‘ulot o‘tkazishini istayman.
Ochig‘ini aytsam, biz Isakning jamoamizda to‘p surishini juda xohlaymiz. Lekin hozircha ‘Aston Villa’ga qarshi o‘yinga qadar bu vaziyatda o‘zgarish bo‘lishini ko‘rmayapman” dedi Eddi Xau jurnalistlar bilan suhbatda.
Ma’lum qilinishicha, “Liverpul” Aleksandr Isakni o‘z safiga qo‘shib olish uchun “Nyukasl”ga yangi taklif tayyorlamoqda. Shu sababli futbolchining kelajagi borasida hali aniq qaror qabul qilinmagan.
Klub rahbariyati va murabbiylar Isakning jamoada qolishini istashmoqda, biroq futbolchi transfer masalasida qat’iy qaror qilgan ko‘rinadi. Shu bois, uning yaqin kunlardagi o‘yinlarda ishtirok etishi noma’lumligicha qolmoqda.
