Ekspert va hakamlar komissiyasi Rossiya futbol ittifoqi hakamlik va inspektorlik departamenti huzurida o‘tkazilgan yig‘ilishda Rossiya Kubogi guruh bosqichi doirasida bo‘lib o‘tgan “Zenit” va “Axmat” uchrashuvida “Zenit” darvozasiga penalti belgilanishini xato deb topdi. Bu haqida Euro-football.ru xabar berdi.
Mazkur uchrashuvda bosh hakam Mixail Cheremnix VAR tizimi orqali maslahat olganidan so‘ng va videoni ko‘rib chiqqach, Aleksandr Sobolevning qo‘li bilan o‘ynaganini aniqladi. Shu sababli penalti belgilandi va “Axmat” jamoasi bitta gol urishga muvaffaq bo‘ldi.
Biroq uchrashuv yakunida hisob 2:1 ko‘rinishida “Zenit” foydasiga hal bo‘ldi. Komissiya bayonotida ta’kidlanishicha, Aleksandr Sobolevning qo‘li to‘p tegishi mumkin bo‘lgan holatda bo‘lsa-da, qo‘li tanaga yaqin joylashgan va to‘pga harakat qilmagan.
Shu bois bu holat jazolanishi lozim bo‘lmagan vaziyat sifatida baholandi. Dastlab hakam o‘yinni davom ettirish to‘g‘ri qaror bo‘lgan, VAR tizimining aralashuvi esa noto‘g‘ri deb topildi.
Mazkur holat o‘yin oxiriga yaqin, aniqrog‘i 83-daqiqada yuz berdi.
