Sobiq “Spartak” futbolchisi Valeriy Kechinov “Evro-Futbol” nashriga bergan intervyusida “Lokomotiv”ga qarshi uchrashuvdagi mag‘lubiyat haqida o‘z fikrlarini bildirdi. Bu haqida Euro-football.ru xabar berdi.
Uchrashuv haqida so‘z yuritar ekan, Kechinov “Spartak”ning himoyadagi o‘yini muvaffaqiyatsiz chiqqanini ta’kidladi. Uning fikricha, bu kabi o‘yin bilan yuqori natijalarga erishish qiyin.
U “Lokomotiv” barcha jihatlarda ustunlik qilmaganini, birinchi bo‘limda to‘p nazorati asosan “Spartak”da bo‘lganini qayd etdi. Mezbonlar esa to‘g‘ri taktika tanlab, bo‘sh zonalarni izlab, qarshi hujumlar orqali g‘alaba qozonishga erishdi.
“Lokomotiv” deyarli barcha imkoniyatlardan unumli foydalandi. Aleksey Batrakovning uchta gol urganiga to‘xtalib, Kechinov uning o‘yini butun Rossiya futboli uchun foydali bo‘lishini, biroq hozircha u o‘zini to‘liq namoyon qilishi va shoshilmaslik kerakligini aytdi.
“Spartak” bosh murabbiyi Stankovich o‘yin so‘ngida jamoada o‘yin inqirozi emas, natija inqirozi borligini bildirgan edi. Kechinov bu borada ham o‘z nuqtai nazarini bildirib, jamoada uch turdan beri g‘alaba yo‘qligi inqirozdan dalolat ekanini, undan chiqish uchun g‘alabalar kerakligini ta’kidladi.
Yaqin turda “Zenit”ga qarshi o‘yin bo‘lib o‘tadi va aynan shu bellashuvda “Spartak” o‘zini ko‘rsata oladi, deb hisoblaydi. Murabbiylar iste’fosi ehtimoli haqida so‘ralganda, Kechinov bunday holat har ikki klubda ham yuz berishi mumkinligini istisno qilmadi.
U “Spartak” futbolchilarida ko‘plab individual xatolar kuzatilayotganini, bunga natijaning yo‘qligi sabab bo‘layotganini, o‘yinchilar ishonch va xotirjamlikni yo‘qotayotganini aytdi. “Lokomotiv”ning chempionlik uchun kurashga tayyorligi borasida esa, hali erta ekanini, ammo jamoa tarkibi va o‘yini yuqori darajada ekanini, tajribali futbolchilar bilan mustahkamlanganini bildirdi.
Kechinov “Lokomotiv”ning barqaror o‘yin ko‘rsatsa, chempionlik uchun kurashga qo‘shilishi mumkinligini qayd etdi.
