"Milan" futbol klubi hujumchisi Santyago Ximenez yangi mavsum boshlanishi oldidan o‘zining kayfiyati haqida so‘z yuritdi. Bu haqida Euro-football.ru xabar berdi.
24 yoshli futbolchi bu yilgi qishki transfer oynasida "Feyenoord" jamoasidan "Milan" safiga 32 million yevro evaziga qo‘shilgan edi. Meksikalik futbolchi jamoa safida 19 ta o‘yinda maydonga tushib, 6 ta gol urishga erishdi.
Shunga qaramay, u o‘zidan kutilgan natijalarni to‘liq oqlay olmaganini tan oldi. Santyago Ximenez yangi mavsumda oldinga siljish va o‘z ustida ishlash niyatida ekanini ta’kidladi.
Futbolchining so‘zlariga ko‘ra, u hozirda avvalgidan ko‘ra ko‘proq ishtiyoq va qat’iyatga ega. Qishki transfer oynasida yangi jamoaga qo‘shilish oson emasligini aytgan Ximenez, hozirda hammasi yangidan boshlanayotganini ta’kidladi.
U o‘ziga va jamoasiga ishonishini, maqsadlarga erishish uchun bor kuchini sarflashga tayyorligini bildirdi. Santyago Ximenez aniq va’da bermasligini, biroq "Milan" bilan chempionlikni qo‘lga kiritishni istashini aytdi.
Ma’lumot uchun, 23 avgust kuni "Milan" A Seriya birinchi turida "Kremoneze" jamoasiga qarshi maydonga tushadi.
