RB Leyptsig futbol klubi Turkiyaning Gyoztepe jamoasida to‘p surayotgan hujumchi Romulo bilan shartnoma imzolash arafasida turibdi. Bu haqida Euro-football.ru xabar berdi.
Ma’lumotlarga ko‘ra, Germaniyaning ushbu klubi yaqinda o‘zining asosiy hujumchilaridan biri Benyamin Sheshkoni Angliyaning Manchester Yunayted jamoasiga sotdi. Ushbu transferning umumiy qiymati bonuslarni hisobga olganda 85 million yevroni tashkil etgan.
Endilikda RB Leyptsig yangi hujumchini tarkibga qo‘shmoqchi. Klub Romuloni aynan Sheshkoni o‘rnini bosuvchi futbolchi sifatida ko‘rmoqda.
Transfer narxi taxminan 20 million yevroga baholanmoqda. Gyoztepe klubi braziliyalik futbolchi uchun tushgan taklifni allaqachon qabul qilgan.
Romulo o‘tgan mavsumda Gyoztepe safida 33 ta o‘yinda maydonga tushib, 17 ta gol urdi va 10 ta golli uzatmani amalga oshirdi. 23 yoshli ushbu futbolchiga ilgari Rossiyaning Zenit va Spartak klublari ham qiziqish bildirgan edi.
Hozirda esa Germaniya klubi unga rasmiy taklif bilan chiqqan va transfer bo‘yicha muzokaralar yakuniga yetmoqda. Shu tariqa, RB Leyptsig yaqin kunlarda Romuloni o‘z tarkibiga qo‘shib olishi kutilmoqda.
