UYEFA «Real Madrid» klubining to‘rt futbolchisi – Kilian Mbappe, Vinisius Junior, Dani Sebalios va Antonio Ryudiger ustidan ish ochganini ma’lum qildi.
«Atletiko» shikoyati va UYEFA tekshiruvi
Ushbu ish «Atletiko Madrid» klubi tomonidan taqdim etilgan to‘rtta videoyozuv asosida qo‘zg‘atildi. Madrid derbisidagi o‘yindan so‘ng, «Real» futbolchilari Ryudiger va Vinisius raqib jamoa muxlislariga nomaqbul ishoralar qilgani qayd etilgan.
UYEFA bu holatni jiddiy baholab, futbolchilarga nisbatan intizomiy choralar ko‘rish imkoniyatini ko‘rib chiqmoqda.
YECHLda diskvalifikatsiya ehtimoli
Eslatib o‘tamiz, «Real» va «Atletiko» Chempionlar Ligasi nimchorak finalida to‘qnash kelgan va «Qirollik klubi» penaltilar seriyasida g‘alaba qozonib, chorak finalga yo‘l olgandi.
«Real» o‘zining chorak final ilk bahsini 8 aprel kuni «Arsenal»ga qarshi mehmonda o‘tkazadi. Agar UYEFA qattiqroq jazo choralarini belgilasa, yuqoridagi futbolchilar ushbu muhim o‘yinni o‘tkazib yuborishi mumkin.
Jazo choralari hali rasman e’lon qilinmagan, biroq UYEFAning qarori «Real»ning keyingi o‘yinlariga jiddiy ta’sir o‘tkazishi mumkin.
