Kecha “Olimpiko”da bo‘lib o‘tgan "Roma" – "Yuventus" uchrashuvi nafaqat natija, balki dramatik burilishlari bilan ham muxlislar yodida qoladigan bo‘ldi. Ushbu muhim bahsda o‘zbekistonlik hujumchi Eldor Shomurodov yana bir bor rimliklarning qahramoniga aylandi.
Tanaffusdan keyin maydonga tushirilgan Eldor 49-daqiqada o‘zining klassik uslubida harakat qilib, "Yuventus" darvozasini ishg‘ol qildi va jamoasini mag‘lubiyatdan qutqardi. Uchrashuv 1:1 hisobida yakunlandi.
Muxlislar va jurnalistlar tomonidan katta e’tiborga sazovor bo‘lgan Eldor, o‘yindan so‘ng "DAZN" telekanaliga bergan intervyusida samimiy fikrlari bilan bo‘lishdi:
– Zaxiradan maydonga tushishdan oldin murabbiy Raneri menga Dovbikka yordam berishimni aytdi. Ikkinchi taymni yaxshi boshladik, afsuski, g‘alabaga erisholmadik. Aslida ikkinchi golni urish imkoniyatimiz bor edi. Biroq, “Yuventus”ga qarshi o‘yinda bir ochko ham yomon natija emas.
Shomurodov o‘z golidan mamnunligini yashirmadi, biroq muxlislarcha istak – dubl qilish istagini ham alohida ta’kidladi:
– Xursandman, albatta. Ammo agar ikkita gol urganimda, bu ajoyib bo‘lardi.
Terma jamoamiz sardori bunday o‘yinlardagi javobgarlikni his qilar ekan, keyingi bellashuv – rim derbisi haqida ham to‘xtalib o‘tdi:
– Biz “Derbi” uchun jiddiy tayyorgarlik ko‘rishimiz kerak. Hozirgacha nimalarga erishgan bo‘lsak, shundan ortga qaytmasligimiz lozim. Muhimi – muxlislarni xursand qilish.
Statistikaga nazar: 29 yoshli Eldor Shomurodov joriy mavsumda “Roma” safida barcha musobaqalarda 30 ta uchrashuvda qatnashib, 6 ta gol va 3 ta assist qayd etgan. E’tiborlisi, u har safar zaxiradan tushganida o‘yinga tetiklik va xarakter olib kirmoqda.
“Yuventus”ga qarshi urilgan gol Shomurodov uchun navbatdagi pog‘ona bo‘ldi. Zahiradan chiqib, jamoani qutqarish – bu shunchaki tasodif emas. Eldor bugun “Roma”ning kurashchi yuragi, muxlislar esa undan yana gollar kutishmoqda.
