So‘nggi yillarda Yevropa futbolini larzaga keltirgan Superliga loyihasi yana kun tartibiga ko‘tarilmoqda. Ispaniya La Ligasi prezidenti Xaver Tebas mazkur loyihaning futbol iqtisodiyotiga zarari va raqobatbardoshlikni pasaytirish xavfi haqida jiddiy xavotir bilan o‘z fikrlarini bildirdi.
Tebasning so‘zlariga ko‘ra, agar bu loyiha amalga oshirilsa, Ispaniya futboli katta iqtisodiy zarar ko‘radi:
“Futbol mamlakatimiz yalpi ichki mahsulotining (YAIM) 1,4 foizini ta’minlaydi. Agar biz Superliga loyihasini qabul qilsak, iqtisodiy zararimiz 1,16 milliard yevroni tashkil etadi. Bu esa mavjud futbol bozorining uchdan bir qismi, ya’ni 32 foizi yo‘qolishi demakdir. Bunday yo‘qotish Ispaniya futboli uchun katta zarbadir”.
La Liga prezidenti, shuningdek, mavjud milliy chempionatning asosiy ustunligi raqobatning yuqori darajasi ekanini alohida ta’kidladi:
“Bizda har bir o‘yin muhim ahamiyat kasb etadi. Chempion jamoa mavsum yakunida 90 ochkodan kamroq yig‘sa, bu yuqori raqobat, har bir o‘yinda g‘alaba uchun kurash ketganini ko‘rsatadi. Liganing eng kuchli jihati ham aynan shunda: g‘olib oldindan ma’lum bo‘lmaganligida”.
Hozirgi mavsum ham bu fikrlarni tasdiqlaydi. Hans-Diter Flik boshchiligidagi “Barselona” 35 o‘yinda 82 ochko to‘plab, yetakchilikni saqlab qolmoqda. Lekin bu jamoaning chempion bo‘lishi hali kafolatlangani yo‘q. Ulardan keyingi pog‘onada Karlo Anchelotti boshqarayotgan “Real Madrid” 75 ochko bilan ikkinchi o‘rinda ketmoqda. Madridning yana bir yirik klubi “Atletiko” esa 70 ochko bilan uchinchi o‘rinni egallab turibdi.
Xaver Tebasning ta’kidlashicha, Superliga loyihasi amalga oshsa, ushbu qiziqarli raqobat muhiti yo‘q bo‘lib ketishi mumkin. Bu esa futbol muxlislari va keng omma uchun salbiy oqibatlarga olib keladi.
Mazkur loyihaning dastlabki talqini 2021 yilda taqdim etilganida Yevropa futbolida juda katta tanqid va qarshilikka uchragan edi. UEFA, FIFA va turli mamlakatlarning milliy federatsiyalari ushbu g‘oyani qabul qilmagan va bu futbolga zarar yetkazishini bildirgan edi. Shu sababli ham Superliga loyihasi keng qamrovli qo‘llab-quvvatlov topa olmagan va vaqtinchalik to‘xtatib qo‘yilgandi.
Zamin.uz tahririyati ham Yevropa futbolida raqobat muhiti saqlanib qolishi va futbolning umumxalq o‘yini sifatida rivojlanishidan tarafdor. Barcha muxlislar yaratilgan jonli raqobat muhitining saqlanishi va futbol tarmog‘ining iqtisodiy barqarorligini ta’minlashga intilishi lozim.
