Ronaldu futbolka almashishni rad etgan yagona klubni aytdi
Besh karra "Oltin to‘p" sohibi, hozirda Saudiya Arabistonining “Al-Nasr” jamoasida faoliyat olib borayotgan portugaliyalik yulduz Krishtianu Ronaldu yaqinda futbolka almashishni istamaydigan yagona klubni ochiqladi. Bu haqda Championat nashri Give Me Sport manbasiga tayanib xabar berdi.
“Roma”ga qarshi o‘yinda mendan gol urmaslikni so‘rashgan”
Ronaldu 2006/07 yilgi UYEFA Chempionlar Ligasi chorak final bosqichidagi “Roma”ga qarshi o‘yinni eslab, o‘sha paytda yuz bergan noodatiy holat haqida gapirdi:
“2007 yilda “Roma”ga qarshi o‘yinda hisob 6:0 edi. Ular bizdan to‘xtashimizni so‘rashdi. Raqib futbolchilari gol urmaslikni iltimos qildi. Hatto menga tan jarohati yetkazish bilan tahdid qilganlar ham bo‘ldi. Shu sababli, men hech qachon “Roma” futbolchilari bilan futbolka almashmaganman va almashmayman ham”, — dedi portugaliyalik hujumchi.
Old Trafforddagi tarixi kecha — 7:1
Eslatib o‘tamiz, 2007 yilgi o‘sha yorqin kechada “Manchester Yunayted” Rimdagi ilk bahsda 1:2 hisobida mag‘lub bo‘lgan bo‘lsa-da, javob uchrashuvida “Old Trafford”da “Roma”ni 7:1 hisobida mag‘lubiyatga uchratgan. Ronaldu o‘sha bahsda ikkita gol muallifiga aylangan edi va bu uning Yevropa miqyosidagi porlashida muhim bosqich bo‘lgan.
Zamin.uz tahririyatidan:
Krishtianu Ronaldu faoliyati davomida ko‘plab katta raqiblar va katta finallarga guvoh bo‘ldi. Biroq “Roma”ga qarshi o‘sha kecha uning xotirasida butunlay boshqacha iz qoldirgan ko‘rinadi. Siz Ronalduning bu e’tirofini qanday baholaysiz?
